Փաստ ինֆո

Թերթն անդրադարձել է 2012թ. ապրիլի 18-ին Կիևյան կամրջից իրեն ցած նետած 21-ամյա Սուսաննա Սարգսյանի դեպքին: Թերթի թղթակցի հետ զրույցում նրա հայրը` Սլավիկ Սարգսյանը, հայտարարել է, որ իր աղջկան սպանել են:

Սարգսյանների ընտանիքը բնակվում է Վայոց ձորի մարզի Շատին համայնքում: Ըստ թերթի` քննիչ Սարգիս Մարգարյանը մահացած աղջկա հարազատներին դեռևս նախաքննության ժամանակ վստահեցրել է, որ ամեն ինչ կանի` իրական հանցագործին գտնելու և պատժելու համար:

Սակայն Սարգսյանները պնդում են, որ քննիչը ոչ միայն ոչինչ չի արել, այլև հանցագործին օգնել է Հայաստանից փախչել: Աղջկա հարազատները պահանջում են կրկին նախաքննություն անցկացնել և պատժել իրական հանցագործին:

Աղջկա հոր խոսքերով` 31-ամյա հանցագործը երկու տարի շարունակ եղել է իրենց տան պատվավոր հյուրը: Ըստ Ս. Սարգսյանի` իր աղջիկն ու երիտասարդը, ում մասին նշում է, որ նա է դստեր մահվան պատճառը, շփվել են «odnoklassniki» կայքի միջոցով, սակայն այդ կապի մասին աղջկա հարազատները տեղյակ չեն եղել:

Ավելին` նրանք պնդում են, որ երիտասարդը Սուսաննային դեղերի միջոցով քնեցրել և սեռական հարաբերություն է ունեցել նրա հետ, ինչից հետո աղջիկը հղիացել է:

«Սարգսյանների ընտանիքը պայքարում է, որպեզի մարդասպանը պատժվի, բայց քննիչ Մարգարյանը լիովին չի կատարել իր խոստումը»,- գրում է թերթը և հավելում, որ մահացածի հարազատները քննիչին են ներկայացրել Սուսաննայի հեռախոսահամարի ելքային ու մուտքային զանգերը:

«Մենք ամեն կերպ օգնել ենք քննիչին, նույնիսկ հանցագործի տեղն ենք ցույց տվել: Խոստացավ, բայց ոչինչ չարեց»,- ասել է Սուսաննայի հայրը:

Թերթի թղթակիցը զրուցել է նաև գործով քննիչ Սարգիս Մարգարյանի հետ, ով ասել է. «Այդ գործով նյութերը ես եմ նախապատրաստել, քրեական գործը հարուցվել է իմ կողմից, սակայն տեղափոխվելով այլ բաժին` նախաքննության կատարումը հանձնվել է մեկ այլ քննիչի: Հիմա ես ոչնչից տեղյակ չեմ»,- ասել է քննիչը և ավելացրել, որ իրեն կաշառակերության մեջ մեղադրելն անհեթեթություն է և իրականությանը չի համապատասխանում: