Փաստ ինֆո

ՀՀ հատուկ քննչական  ծառայությունում ավարտվել է ՀՀ ոստիկանության «Ճանապարհային ոստիկանություն» ծառայության սպայական վաշտի հրամանատարի կողմից ենթակա տեսուչներին ապօրինի ցուցումների, ինչպես նաև կաշառքի դեպքով գործի նախաքննությունը և ուղարկվել դատարան:

Այսպես, ըստ մեղադրանքի, ճանապարհի ծածկույթն աղտոտելու խախտում կատարելու համար օրենքով նախատեսված 30.000 դրամ տուգանքի փոխարեն՝  ՀՀ ոստիկանության «Ճանապարհային ոստիկանություն» ծառայության 2-րդ սպայական գումարտակի 3-րդ սպայական վաշտի հրամանատար, ոստիկանության փոխգնդապետ Արսեն Գրիգորյանի ապօրինի ցուցումով նրա  ենթակա տեսուչ Նորայր Ասլանյանը  կազմել  է   5000 դրամ տուգանք նախատեսող արձանագրություն:  Գումարի նվազեցումը կատարվել  է ծանոթության միջոցով՝  «Բաղրամյանշին» ԲԲԸ մենեջեր Արթուր Խաչատրյանը ծանոթ էր հիշյալ վերադասի հետ և մեկ  հեռախոսազանգի արդյունքում խախտումը  կատարող «Բաղրամյանշին» ԲԲԸ պատկանող «ԶԻԼ» մակնիշի բեռնատարի վարորդը ստացել է նվազ տուգանք նախատեսող արձանագրություն:

Այդ ծանոթությունը իր ազդեցությունն է ունեցել  «Բաղրամյանշին» ԲԲԸ պատկանող մեկ այլ  բեռնատարի վարորդի կողմից նույնպիսի  խախտման պարագայում՝  30 հազար դրամ գումարը մեկ զանգի շնորհիվ  նորից դարձել էր  5000:

Արսեն Գրիգորյանի հետ ծանոթ էր նաև բեռների փոխադրման պատվիրատու «Տաթև» ՍՊԸ տնօրեն Սպարտակ Սանթրոսյանը, ով հորդորել է առաջինին  սահմանված եզրաչափերը գերազանցող բեռներ փոխադրելու համար նախատեսված  40 հազար դրամ տուգանքի փոխարեն կազմել նվազ չափի՝ 3000 դրամի տուգանքի արձանագրություն, ինչը և ոստիկանության ավագ լեյտենանտ Գրիգոր Հովակիմյանը արել է՝  վերոհիշյալ վերադասի ապօրինի ցուցումով: 

Արսեն Գրիգորյանն  «ընդառաջել է»  նաև  դարբնոցի տնօրեն Հայկ Թադևոսյանին կաշառքի գումարը նվազեցնելու հարցում: Նախ հիշյալ ստորաբաժանման տեսուչ Հովսեփ Հակոբյանը  մեքենայի վարորդի՝ դարբնոցի մատակարար Պարույր Թալանչյանի  թույլ տված ճանապարհային երթևեկության կանոնների խախտումը՝  սահմանված արագության գերազանցումը, այլ  մեքենայի պատկանող  տեխզննման և ԱՊՊԱ կտրոններով երթևեկելը,   չարձանագրելու համար և  150.000 դրամի չտուգանելու դիմաց  պահանջել է  15 հազար դրամ: Ապա դարբնոցի տնօրենը Արսեն Գրիգորյանին խնդրել  է միջնորդել  Հ.Հակոբյանին ու 15000-ի  փոխարեն 5000 դրամ կաշառք վերցնելով չարձանագրել թույլ տված խախտումը և բաց թողնել Պարույր Թալանչյանին, որն էլ Հովսեփ Հակոբյանը կատարել է:

Այս քրեական գործով մեղադրանք է առաջադրվել 6 անձի՝ ճանապարհային ոստիկանության տեսուչներ Անդրանիկ Կաղյանին, Նորայր Ասլանյանին, Գրիգոր Հովակիմյանին, Ռուբեն Պետրոսյանին մեղադրանք է առաջադրվել ՀՀ քրեական օրենսգրքի 308-րդ հոդվածի առաջին մասով՝ պաշտոնեական լիազորությունները չարաշահելու համար, Հովսեփ Հակոբյանին՝ ՀՀ քրեական օրենսգրքի 311-րդ հոդվածի 1-ին մասով՝ կաշառք ստանալու համար։ 3-րդ սպայական վաշտի հրամանատար Արսեն Գրիգորյանին, ում հրահանգով, ըստ մեղադրանքի տեսուչները նվազեցրել են տուգանքները,  մեղադրանք է առաջադրվել  երկու հոդվածով՝ ՀՀ քրեական օրենսգրքի 313-րդ հոդվածի 2-րդ մասի 2-րդ կետով և 308-րդ հոդվածի 1-ին մասով՝ պաշտոնեական դրությունն օգտագործելով կաշառքի միջնորդություն անելու եւ պաշտոնեական լիազորությունները չարաշահելու համար։