Փաստ ինֆո

Երևանի Աջափնյակ և Դավիթաշեն վարչական շրջանների ընդհանուր իրավասության առաջին ատյանի դատարանում երեկ սկսվել է «Նաիրի Ինշուրանս» ապահովագրական ընկերության հայցի քննությունն ընդդեմ Մարինա Առաքելյանի` 3մլն. 999 6000 ՀՀ դրամի պահանջի մասին:

Մ. Առաքելյանի անունով ապահովագրված «Վոլքսվագեն Ջետտա» ավտոմեքենան վարել է նախկին ամուսնու հայր` Մ. Ավետիսյանը: 2011թ. սեպտեմբերին Արտաշատ-Երևան ավտոճանապարհին մեքենան ընկել է ձորը, ուղևոր Ա. Հախվերդյանը մահացել է, իսկ 4 ուղևորները մարմնական տարբեր աստիճանի վնասվածքներ են ստացել և տեղափոխվել հիվանդանոց:

ՀՀ ոստիկանության Արարատի քննչական բաժնում հարուցվել է քրեական գործ: Սակայն Մ. Առաքելյանը ոչ միայն չի կանչվել որպես վկա, այլև քրեական գործի վարույթը կարճվել է ` իրադրության փոփոխման հիմքով:

Ըստ ԱՊՊԱ-ի` տուժողի հուղարկավորության ծախսերը հատուցվում են օրինական ուժի մեջ մտած դատական ակտով սահմանված չափով, մինչդեռ դատական ակտ չկա: Քաղաքացիական, քրեական, վարչական գործ հարուցված չլինելու դեպքում հայցվորի պնդմամբ տուժողի հուղարկավորության հետ կապված ծախսերը գնահատվում են միանվագ կերպով:

Սահմանված գումարը վճարվում է ապահովագրական հատուցում ստանալու դիմում ներկայացրած այն անձին, ով առաջին անգամ ներկայացրել է տուժողի մահվան վկայականի բնօրինակը: Իսկ մահվան վկայականը ներկայացրել է Վարուժան Ավետիսյանը` Մ. Առաքելյանի ամուսինը, ով վերջինիս հետ հանդիսանում է ԱՊՊԱ վկայագրով լիազորված տիրապետող: Ապահովագրական ընկերությունը հատուցում է տվել Վ. Ավետիսյանին` որպես տուժողի: Այդ մասին ապահովադիրը տեղյակ չի եղել, անգամ չեն ծանուցել:

Ապահովագրական ընկերության այն փաստարկին, թե Մ.Առաքելյանին ծանուցել են, վերջինի ներկայացուցիչը խնդրել է ծանուցման կտրոնները, սակայն ապահովագրական ընկերության ներկայացուցիչը պատասխանել է, որ դրանց չի տիրապետում: