Փաստ ինֆո

Կենտրոն և Նորք-Մարաշ վարչական շրջանների ընդհանուր իրավասության դատարանում ավարտվել է «Դարմ» ՍՊ ընկերության տնօրեն Մ. Օգանեզովի դեմ հարուցված քրեական գործի դատաքննությունը: Այս մասին գրում է թերթը` ավելացնելով, որ Մ. Օգանեզովը զբաղվել է ֆուրշետների կազմակերպմամբ:

Ըստ մեղադրանքի` նա խուսափել է կատարել հարկային պարտավորությունները, կանխամտածված ստեղծել է անվճարունակության հատկանիշներ և պետությանը պատճառել 12 182 000 դրամի վնաս:

Մ.Օգանեզովի նկատմամբ խափանման միջոց է ընտրվել ստորագրություն` չբացակայելու մասին:

Մեղադրող Ջ. Ֆարխոյանը դատական վիճաբանությունների փուլում պահանջել էր 3 տարվա ազատազրկում, սակայն նրան հետագայում փոխարինած մեղադրող Ա. Սիմոնյանը բանավոր ասել է, թե սխալմամբ 3,5 տարվա ազատզրկման փոխարեն միջնորդել են 3 տարով ազատազրկում:

Մ. Օգանեզովի շահերի պաշտպան Լիանա Գրիգորյանը պնդել է, որ առաջադրված մեղադրանքն անհիմն է և պահանջել, որպեսզի արդարացնեն իր պաշտպանյալին: Նա նշել է, որ Օգանեզովի գործողություններում բացակայում են կանխամտածված սնանկության հիմքերը, այն ավելի շատ կարող է որակվել որպես անփութություն: Նա հայտնել է նաև, որ Մ. Օգանեզովը 9 միլիոնից վճարել է 3 միլիոնը և ազատազրկվելու դեպքում չի կարողանա մնացած գումարը մուծել:

Մեղադրյալը դատարանից խնդրել է թեթև պատիժ: Նա իրեն մեղավոր է ճանաչել:

Պաշտպանը հայտնել է, որ Մ. Օգանեզովի անձնական գույքի վրա արգելանք է դրված, մինչդեռ ՍՊ ընկերությունների մասին օրենքով` արգելանք կարող է դրվել ընկերության գույքի վրա:

Դատարանի վճռով Մ. Օգանեզովը մեղավոր է ճանաչվել և դատապարտվել ազատազրկման` 3,5 տարի ժամկետով:

Լ. Գրիգորյանն ու Մ. Օգանեզովը մտադիր են բողոքարկել առաջին ատյանի դատարանի դատավճիռը:

Թերթը գրում է, որ Հայաստանում 4000-ից ավելի ՍՊ ընկերությունների տնօրեններ կան, ում սպառնում է Օգանեզովի ճակատագիրը` կանխամտածված սնանկության գործողություններ կատարելու համար ազատազրկում: