Փաստ ինֆո

Քրեական այս բազմադրվագ գործով Աբովյան քաղաքի բնակիչ Նարեկ Արզումանյանը մեղադրվում է տարբեր տեսակի մետաղների ու դրանցից պատրաստված իրերի գողության համար: Նախաքննությամբ մասնավորապես պարզվել է, որ նա նախնական համաձայնության գալով նույն քաղաքի բնակիչ Առնակ Նալբանդյանի հետ, 2012թ. փետրվարին միասին ապօրինի մուտք են գործել Աբովյան քաղաքի Սարալանջ թաղամասում գտնվող Մարտիրոս Բադալյանին պատկանող ցանկապատված հողամաս և այնտեղից հափշտակել տարբեր տեսակի մետաղի ջարդոններ, գողոնը վաճառել են, ստացված գումարը ծախսել անձնական կարիքների համար:

Այնուհետև՝ 2012թ. մայիսին Արզումանյանն ապօրինի մուտք է գործել Աբովյան քաղաքի 6-րդ միկրոշրջանում գտնվող Վահան Թովմասյանին պատկանող ցանկապատված հողամաս և այնտեղից գաղտնի հափշտակել տարբեր տեսակի լատունից պատրաստված ջրի ծորակներ:

Իսկ 2012թ. սեպտեմբերին միայնակ մուտք է գործել Աբովյան քաղաքի Էներգետիկական քոլեջին պատկանող ապաստարան և այնտեղից նույն կերպ հափշտակել ցերեկային լույսերի պղնձյա դետալներ։ Ինչպես առաջինի, այնպես էլ վերջին երկու դեպքերում գողոնը վաճառվել է, իսկ ստացված գումարը դարձյալ ծախսվել անձնական կարիքների համար: Նարեկ Արզումանյանին նկարագրված երեք դրվագներից առաջինի առնչությամբ մեղսագրվում է հանցավոր արարք` նախատեսված ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով, երկրորդի առնչությամբ` 177-րդ հոդվածի 2-րդ մասի 3-րդ կետով, իսկ երրորդի կապակցությամբ` 177-րդ հոդվածի 1-ին մասով:

Նույն քրեական գործի շրջանակներում ՀՀ քր. օր.-ի 177-րդ հոդվածի 2-րդ մասի 1-ին և 3-րդ կետերով մեղադրանք է առաջադրվել նաև Առնակ Նալբանդյանին: Պարզվել է, որ նա Նարեկ Արզումանյանի հետ Մարտիրոս Բադալյանի հողամասից մետաղաջարդոնների հիշյալ հափշտակությանը մասնակցելուց բացի, դրանից մի քանի օր անց միայնակ մտել է նույն հողամաս և այնտեղից գաղտնի հափշտակել պղնձյա մալուխ:

Հետաքրքիր է, իսկ խոշոր խմբաքանակներին երբ է հերթը հասնելու կամ ընդհանրապես կհասնի՞...