Փաստ ինֆո

ՀՀ նախագահի փետրվարի 18-ի ընտրություններին հաջորդած հետընտրական զարգացումների կապակցությամբ Ազգային ժողովի արտահերթ նիստ հրավիրելու շուրջ քննարկումները շարունակվում են: ԱԺ խմբակցությունների ղեկավարները ներկայումս աշխատում են հայտարարության տեքստի վրա: «Եթե ընդհանուր համաձայնության գանք, կկազմակերպենք արտահերթ նիստ և կքննարկենք հետընտրական պրոցեսները, որի վերջում կունենանք ընդունված հայտարարություն»,-փետրվարի 27-ի ասուլիսում հայտնեց ԱԺ նախագահ Հովիկ Աբրահամյանը` հավելելով, որ հայտարարության շուրջ համաձայնության չգալու դեպքում «պրոցեսները կշարունակվեն»:

Անդրադառնալով ընտրությունների արդյունքներին, ԱԺ նախագահը նշեց, որ Սերժ Սարգսյանը պարտվել է Հայաստանի 915 համայնքներից ընդամենը 70-ում, այդ թվում` 15 քաղաքային և 55 գյուղական համայնքներում: Ըստ նրա, դա վատ ցուցանիշ չէ, և իրենց թեկնածուի ստացած 58,64 տոկոսը` «ցանկալի և ուրախալի է»: Նա նշեց նաև, որ ՀՀԿ-ն դեմ է այն տեսակետներին, թե իր թեկնածուի պարտության համար մեղավոր են տվյալ համայնքների ղեկավարները. «Դրանք ընդհանուր խնդիրներ են, որոնք պետք է հետագայում քննարկենք ու հասկանանք»:

Հ.Աբրահամյանն ընդգծեց, որ իրենք այս ընտրություններում «հաղթել են և հաղթել են շատ լավ ցուցանիշներով»: Նա նշեց նաև, որ, իր կարծիքով, բոլոր քաղաքական ուժերը, այդ թվում` «Ժառանգություն»-ը, և ՀՀ նախագահի բոլոր թեկնածուները «պետք է ընդունեն պարտությունը, շնորհավորեն հաղթող թեկնածուին և փորձեն այդ իրենց 539 հազար ձայներն օգտագործել ոչ թե փողոցային միտինգներում, այլ առաջարկել Նախագահին, իշխանություններին` ապագայում օգտագործել իրենց առաջարկները և կատարել մեծ բարեփոխումներ բոլոր ոլորտներում»: ԱԺ նախագահը վստահեցրեց, որ իրենք պատրաստ են քննարկել ցանկացած ողջամիտ առաջարկ:

Ի պատասխան «Pastinfo.am»-ի թղթակցի հարցին, թե նախագահական ընտրություններին մասնակցած շուրջ 1,5 մլն քաղաքացիներից հօգուտ իշխանության թեկնածուի 861 հազարի քվեարկելն արդյո՞ք իշխանությանը մտորելու առիթ չի տալիս, և բարեփոխումներին ուղղված ի՞նչ քայլեր է մտադիր իրականացնել իշխանությունը սեփական նախաձեռնությամբ` չսպասելով ընդդիմության առաջարկներին. «Մեր ծրագրերի իրականացումը որևէ կապ չունի ընդդիմության առաջարկի հետ: Ես ուղղակի ասում եմ` եթե ունեն ողջամիտ առաջարկներ, որը կօգնի իշխանությանը ռեֆորմներ իրականացնել ճիշտ ուղղությամբ, մենք պատրաստ ենք քննարկել ոչ միայն Րաֆֆի Հովհաննիսյանի, այլ նաև բոլոր քաղաքական ուժերի կողմից, նույնիսկ` անհատ քաղաքացիների կողմից»:

Ինչ վերաբերում է նրան, թե ի՞նչ են մտածում իշխանությունները հարյուրհազարավոր քաղաքացիների կողմից իրենց ձայն չտալուն. «Այո’, մտածելու տեղիք տալիս է: Մենք գիտենք, որ մեր երկրում ունենք սոցիալապես անապահով խավեր, մենք գիտենք, որ մեր երկրում կան մարդիկ, որոնք դժգոհ են տարբեր նախարարություններից, տարբեր չինովնիկներից, տարբեր գերատեսչություններից»: Հ.Աբրահամյանը վստահեցրեց, որ իրենց թիմը` Սերժ Սարգսյանի գլխավորությամբ, ունի քաղաքական կամք` երկրի և ժողովրդի առջև ծառացած բոլոր խնդիրներին լուծում տալու համար: