Փաստ ինֆո

Երևանի Կենտրոն և Նորք-Մարաշ վարչական շրջանների դատարանը՝ դատավոր Ռուբեն Ափինյանի նախագահությամբ, մարտի 7-ին կհրապարակի իր որոշումը նախկին դատապարտյալ Ռազմիկ Աբրահամյանն ընդդեմ «Հայկական ժամանակ» և «Առավոտ» օրաթերթերի հայցադիմումի գործով:

2004 թվականի մարտի 29-ի դատավճռով 9 տարվա ազատազրկման դատապարտված և անցյալ տարի ազատ արձակված Ռազմիկ Աբրահամյանը թերթերից պահանջում է հատուցել իր պատվին ու արժանապատվությանը հասցված վնասը, որը նա գնահատում է 4.000.000 ՀՀ դրամ՝ 2 մլն-ական դրամ յուրաքանչյուր լրատվամիջոցից:

Այսօր մինչ դատարանի խորհրդակցական սենյակ հեռանալը հայցվորը հայտարարեց, որ վերանայում է իր հայցապահանջի չափը, յուրաքանչյուր լրատվամիջոցից պահանջում է մեկական մլն. դրամ:

Զոհերի անպաշտպան վիճակից օգտվելով անառակաբարո գործողություններ կատարելու համար դատապարտված Ռ.Աբրահամյանը կարծում է, թե ինքը դատապարտվել է 2003թ. սեպտեմբերի 26-ին «Առավոտ» օրաթերթում Ռուզան Մինասյանի ստորագրությամբ լույս տեսած «Պեդոֆիլը կստանա երկու տարի՞» և 2003 թվականի սեպտեմբերի 5-ին «Հայկական ժամանակ» օրաթերթում Ա.Կարապետյանի ստորագրությամբ լույս տեսած «62-ամյա պետերաստը խոստովանել է իր մեղքը» հոդվածների հրապ արակման պատճառով:

Լրատվամիջոցները, բնականաբար, համաձայն չեն այս «մեղադրանքի» հետ, քանի որ դրանք շատ մեղմ, զուտ տեղեկատվական բնույթի հոդվածներ են եղել՝ հղումների օգտագործմամբ: Ճիշտ է, լրատվամիջոցները համոզված են իրենց հրապարակումների ճշմարտացիության մեջ, առավել ևս, երբ գործով առկա է օրինական ուժի մեջ մտած մեղադրական դատավճիռ, այդուհանդերձ, օրաթերթերը ներկայացնում են հայցադիմումի մերժման այլ հիմքեր՝ հայցի վաղեմության ժամկետի լրանալը՝ հայցը  վերաբերում է շուրջ 10 տարի առաջ՝ 2003 թվականին հրապարակված հոդվածներին։