Փաստ ինֆո

Երևանի, հնարավոր է, նաև հանրապետության այլ բնակավայրերի սուպերմարկետներում և խանութներում վերջին շրջանում նկատվում է ձվերի գների աճ, ինչը Սուրբ Զատիկի տոնից առաջ տեղիք է տվել սպառողների անհանգստությանը և դժգոհությանը: Օրինակ, փետրվարի 23-ին «Լուսակերտի թռչնաբուծական ֆաբրիկա» ընկերության արտադրած ձուն, որ նախկինում վաճառվում էր 60 դրամով, խանութում վաճառահանված էր 65 դրամով:

- Մեր երեկվա մոնիտորինգն արձանագրել է գրեթե բոլոր արտադրողների ձվերի գների 1-2 դրամի բարձրացում` յուրաքանչյուր ձվի հաշվով,- այսօր մեզ հետ զրույցում ասաց ՀՀ տնտեսական մրցակցության պաշտպանության պետական հանձնաժողովի նախագահի մամուլի քարտուղար Գայանե Սահակյանը:

Ի պատասխան մեր տարակույսի, թե հանձնաժողովի աշխատակազմի աշխատակիցներն ինչպե՞ս են ձվերի գների 1-2 դրամանոց աճ արձանագրել, երբ այդ աճն իրականում ավելին է, մամուլի քարտուղարն ասաց.

- Մեր աշխատակիցներն իրավասու չեն խանութներում վերահսկողություն իրականացնելու, նրանք մտնում են միայն գերիշխող սուպերմարկետներ, գնային մոնիտորինգն իրականացնում են բացառապես «Երևան Սիթի», «Սթար», «Նոր Զովք», «ՍԱՍ» և «Մոսկվիչկա» սուպերմարկետներում:

Գ. Սահակյանի տեղեկացմամբ՝ փետրվարի 25-ին հանձնաժողովի նախագահը կայացրել է որոշում, ըստ որի, մինչ այժմ շաբաթը երեք անգամ իրականացվող մոնիտորինգն ամենօրյա է դարձել և շարունակվելու է մինչև Սուրբ Զատիկի տոնը (ներառյալ):

- Այսօր արդեն համապատասխան գրություններ կուղարկվեն ձվի արտադրությամբ զբաղվող տնտեսվարողներին, նրանցից պահանջում ենք ներկայացնել իրենց արտադրության օրական ծավալների, իրացման ծավալների, գների, պահեստի մնացորդների վերաբերյալ տեղեկություններ, թե ձվերը որքան են մնում իրենց մոտ,- ասաց մամուլի քարտուղարը:- Սուպերմարկետներից էլ տեղեկատվություն է պահանջվելու, թե ինչ գնով են ստանում ձվերը, ինչ գնով են վաճառում, տվյալ պահին ինչպիսին են սպառման ծավալները:

Ըստ Գ. Սահակյանի՝ հանձնաժողովն այդ ամենը խիստ վերահսկողության տակ է պահում, և եթե ուսումնասիրությունների արդյունքում պարզվի, որ կան անհիմն գնային բարձրացումներ, հանձնաժողովը միանշանակ կկիրառի համապատասխան միջոցներ:

Հեղինակ` Արթուր Հովհաննիսյան