Փաստ ինֆո

Երևանի Ավան և Նոր Նորք վարչական շրջանների դատարանում՝ դատավոր Դավիթ Հարությունյանի նախագահությամբ, «Հարսնաքար» ռեստորանային համալիրի տարածքում 2012թ. հունիսի 17-ի բռնարարքի գործով այսօրվա դատական նիստում ավարտվեց դատա-բժշկական փորձագետ Գևորգ Գաֆարյանի հարցաքննությունը: Փորձագետն անց էր կացրել բռնարարքից հետո 12 օր անց մահացած ռազմական բժիշկ Վահե Ավետյանի դիակի դատաբժշկական փորձաքննությունը:

Ի պատասխան տուժող ու պաշտպանական կողմերի հարցերին՝ փորձագետը հայտնեց, որ Վ.Ավետյանին հասցված հարվածների հերթականությունը հնարավոր չէ որոշել: Ըստ նրա` յուրաքանչյուր վնասվածքի համար կարելի է հաստատապես ասել, որ առնվազն մեկ հարված է հասցվել: Նույնը վերաբերում է նաև քթոսկրերի կոտրվածքին, քանի որ թեև երկու ոսկոր է կոտրվել, սակայն կոտրվածքները գտնվել են մեկ գծի վրա և կարող էին հասցվել առնվազն մեկ հարվածի հետևանքով:

Ամբաստանյալ Նորայր Հայրապետյանի պաշտպան Երեմ Սարգսյանը հայտարարեց, որ փորձագետի հարցաքննությամբ հնարավոր չեղավ պարզել, թե արդյոք գլխի շրջանում Վ.Ավետյանին պատճառված վնասվածքներից յուրաքանչյուրն առաջացրել է գլխուղեղային տրավմա, որն էլ մահվան պատճառ է հանդիսացել: Ըստ պաշտպանի՝ այս ենթադրական բնույթի եզրահանգումը մեղադրանքի հիմքում դնելու դեպքում այն կհանգեցնի անմեղության կանխավարկածի խախտմանը:

Մեղադրող Արթուր Դավթյանը չհամաձայնեց այս դիրքորոշման հետ և իր հերթին հայտարարեց, որ փորձագետի եզրահանգումը հստակ էր՝ դեմքի շրջանում առկա վնասվածքները պատճառական կապի մեջ են գլխուղեղի վնասվածքի հետ, որն էլ մահ է առաջացրել:

Իր հարցաքննության առաջին օրը փորձագետը հայտնել էր, որ տուժողի մարմնին հայտնաբերվել են բազմաթիվ մարմնական վնասվածքներ՝ գլխուղեղի վնասվածք, քթոսկրերի կոտրվածք, արյունազեղումներ, արյունահավաք, քերծվածքներ: Մասնավորապես գլխի շրջանում եղած բոլոր վնասվածքներն առանձին-առանձին ու միասին վերցրած Վ.Ավետյանի առողջությանը ծանր վնաս պատճառող, կյանքին վտանգ սպառնացող վնասվածքներ են եղել և ի վերջո հանգեցրել են մահվան: Մահվան հետ պատճառահետևանքային կապ ունեցող վնասվածքներն ընդհանուր առմամբ 5-ն են եղել, իսկ մահվան հետ պատճառահետևանքային կապ չունեցողները՝ 9-ը:

Ի պատասխան գործով դատավարական հսկողություն իրականացնող դատախազ, մեղադրող Արթուր Դավթյանի հարցին՝ փորձագետը նշել էր, որ վնասվածքները կյանքի հետ անհամատեղելի չէին, այլ կյանքի համար վտանգավոր վնասվածքներ էին, որոնք հանգեցրել էին մահվան:

Փորձագետն ընդգծել էր նաև, որ ինքն իրավունք չունի գնահատել Վ.Ավետյանին բուժօգնություն ցույց տված բժիշկների գործողությունները՝ դա կատարվում է բժշկական հանձնաժողովային փորձաքննությամբ, իսկ ինքը կատարել է դիակի առաջնային դատաբժշկական փորձաքննություն:

Մարտի 1-ի դատական նիստում նախատեսվում է, որ կսկսվի ամբաստանյալների հարցաքննության փուլը: Եթե պարզվի, որ ամբաստանյալները դեռևս պատրաստ չեն ցուցմունքներ տալու, հնարավոր է, որ դատարանը կքննարկի պաշտպանական կողմի միջնորդությունը ապացույցների հետազոտման կարգը փոխելու և գործի գրավոր ապացույցները հետազոտելու մասին: