Փաստ ինֆո

Բոլոր զարգացումները տանում են նրան, որ ամերիկահայ ներդրող ու գործարար Ներսես Եսփանոսյանը կդիմի ԱՄՆ-ում Ներդրումների պաշտպանության կենտրոնին և Հայաստանի Հանրապետությունը պարտություն կկրի: Այս մասին «Pastinfo.am»-ի թղթակցին հայտնեց սփյուռքահայ ներդրողի ներկայացուցիչ, փաստաբան Նիկոլայ Բաղդասարյանը:

Սփյուռքահայը Սևան քաղաքում ահռելի ներդրումներ է արել և դեռ պետք է շարունակեր անել հսկայական  հյուրանոցային համալիրի և դրա շրջակա հանգստի գոտու շինարարության վրա: Ն.Եսփանոսյանի ծրագրերի իրականացման դեպքում Սևան քաղաքն, ըստ նրա ներկայացուցչի, մեծ զարգացում կապրեր, ինչպես նաև այն քայլ կլիներ՝ ամբողջ երկրի մասշտաբով զարգացնելու զբոսաշրջությունը:

Փաստաբանն ընդգծեց, որ պետության պարտավորությունն է խթանել  ներդրումները, ինչն ամրագրված է  միջազգային պայմանագրերով, իսկ ԱՄՆ և Հայաստանի միջև երկկողմանի պայմանագիրը թույլ է տալիս ներդրողին՝ պետության սխալ քաղաքականության հետևանքով վնասներ կրելու դեպքում դիմել  միջազգային դատարան, որտեղ կարող է ստանալ իր կրած վնասի հատուցումը և չստացած օգուտները:

«Սպիտակ ափ» ՓԲԸ-ի սեփականատեր ամերիկահայ ներդրողը Սևանա լճի հարակից տարածքում  ձեռք է բերել և  վերակառուցել պանսիոնատի հին շինությունը: Սակայն անշարժ գույքի կադաստրի տարածքային ստորաբաժանումը՝ առանց կողմին տեղյակ պահելու, փոխել է Սևանա լճի հարակից տարածքում 50 հեկտար արտադրագիտական կատեգորիայի հողատարածքի տիրապետման ձևը՝ սեփականությունը վերածելով վարձակալության: Այդ մասին սփյուռքահայ գործարարն իմացել է միայն դատարանում, որտեղ իրեն «անակնկալ են մատուցել»՝ պահանջելով վերակնքել վարձակալության պայմանագիրը: Կադաստրի կողմից սեփականության վկայականում կատարված «ուղղման» որոշումը անվավեր ճանաչելու հայցապահանջը Վարչական դատարանում և վերադաս ատյաններում մերժվել է, այսինքն՝ սպառվել են «կադաստրի ապօրինությունները» բողոքարկելու ներպետական հնարավորությունները:

Գործի նախապատմությունը հետևյալն է՝ «Լավանդա» հանգստյան գոտու անմիջական հարևանությամբ և նույն հարթության վրա գտնվող 50 հեկտար արտադրագիտական կատեգորիայի հողատարածքը ՀՀ Հողային օրենսգրքի փոփոխությունների ուժով սեփականության իրավունքով փոխանցվել է սփյուռքահայ գործարարին և նրա հիմնած «Սպիտակ ափ» ՓԲԸ-ին: Անձը դիմել է կադաստր և ստացել սեփականության վկայական: Եվս 30 հեկտարի՝ ավելի ճշգրիտ՝ 29.73 հա հողատարածքի նկատմամբ քաղաքապետարանի համայնքի հետ կնքվել է վարձակալության պայմանագիր:

Հողային օրենսգրքի 60-րդ հոդվածով նախատեսվում է սահմանափակում՝ հողատարածքը չի կարող սեփականաշնորհվել, եթե այն պատմամշակութային նշանակություն ունի, ջրային կամ անտառտնտեսության հողատարածք է: Ն. Բաղդասարյանն ընդգծեց, որ տարածքի կատեգորիան կարող էր փոխվել կառավարության համապատասխան որոշմամբ, ինչը տեղի չի ունեցել, հողատարածքի կատեգորիան փոխվել է «ջրային»-ի՝ կադաստրի ուղղումով: Ընդ որում, «ուղղումը» վերաբերել է ողջ հսկայական տարածքին, թեև դրա որոշ մասը գտնվում է Սևանա լճից բավականին մեծ հեռավորութայն վրա: Հետաքրքրական է նաև, որ «ուղղումը» չի տարածվել հարևան «Լավանդա»-ի վրա՝ պարզ տրամաբանությամբ նույն տարածքում, նույն աշխարհագրական դիրքում գտնվող «Լավանդա»-ի տարածքը նույնպես պետք է ջրային համարվեր:

Փաստաբանը հայտնեց նաև, որ մեկ այլ ամերիկահայ ներդրողի ու գործարարի՝ Էդմոն Խուդյանի,  գործով որոշակի առաջընթաց կա,  ներկայումս ամերիկյան փաստաբանները զբաղվում են, որպեսզի գործը ԱՄՆ-ում քննվի: «Ես ընթացակարգերին բավականին ծանոթ լինելով՝  գտնում եմ, որ  Հայաստանն այլընտրանք չի ունենա, քան առաջարկել հաշտություն կնքել»,- ասաց Ն.Բաղդասարյանը:  Ըստ Է.Խուդյանի, իր հայաստանյան գործընկերը «գցել է» իրեն ու տիրացել իր շահույթին: