Փաստ ինֆո

«Ժամանակ» օրաթերթի հիմնադիր «Սկիզբ» մեդիա կենտրոնը շատ ուշ է ստացել իր դեմ Ռոբերտ ու Սեդրակ Քոչարյանների հայցադիմումը, չի ուսումնասիրել այն, ուստի դեռևս չի կարող ասել, թե դրանում ներկայացված փաստերից որոնք է ընդունում և որոնք ոչ: Այս մասին «Փաստինֆո» գործակալության թղթակցին հայտնեց Մեդիա կենտրոնի ներկայացուցիչ, փաստաբան Նիկոլայ Բաղդասարյանը: Փաստաբանը գտնում է, որ իրականում ոչ թե պատվի ու արժանապատվության խնդիր կա, այլ առկա է լրատվամիջոցի գործունեությունը խոչընդոտելու արհեստական միտում:

Մեդիա կենտրոնի ներկայացուցիչն ընդգծեց, որ մինչ հայցադիմումը ստանալը առձեռն ստացել են դատարանի որոշումը, որով մասնակի բավարարվել է հայցվոր կողմի միջնորդությունը «Ժամանակ» օրաթերթի հիմնադիր «Սկիզբ» մեդիա կենտրոնի գույքի վրա արգելանք դնելու մասին:

Ըստ պատասխանողի ներկայացուցչի՝ հայցվոր կողմը միջնորդել էր արգելանք դնել նաև ընկերության դրամական միջոցների վրա, սակայն դատարանը այդ մասով մերժել է միջնորդությունը, քանի որ հայցվորները «սխալ են իմացել, թե որ կազմակերպությունն ինչ գույք ունի՝ հայցվորները չեն տարբերել, որ չգործող և գույք չունեցող «Առաջին լրատվական» ՍՊԸ-ն որևէ կապ չունի ո՛չ «Ժամանակ» օրաթերթի և ո՛չ էլ «Առաջին. am» կայքի հետ»,- նշեց Ն.Բաղդասարյանը, հավելելով ՝ ճիշտ է, «Առաջին լրատվական»-ի հիմնադիրը «Սկիզբ» մեդիա կենտրոնի հիմնադրի եղբայրն է:

Այդ սխալի շնորհիվ, ըստ Ն.Բաղդասարյանի, ընկերության դրամական միջոցները չեն արգելափակվել և ընկերությունը կարողացել է շարունակել իր գործունեությունը նաև ՀՀ նախագահական ընտրությունների շրջանում:

Հայցվորները դատարանին հայտնել են, որ իրենց լիազորած անձը դիմել է ընկերությանը հերքում տպելու համար, ինչն, ըստ կողմի ներկայացուցչի, չի համապատասխանում իրականությանը, հայցվորների անունից ընկերությունն իրոք նամակ ստացել է, սակայն նամակին որևէ լիազորագիր կցված չի եղել, որևէ տեղից չի երևում, որ տվյալ անձը առնչություն ունի Ռոբերտ ու Սեդրակ Քոչարյանների հետ: «Նախկինում էլ տվյալ անձը դիմել էր ընկերություն, մենք պատասխան էինք գրել, այնուհետև նա պատասխան էր գրել, որ ինքը լիազորված չի եղել որևէ կողմից նման նամակ գրելու»,- ասաց Ն.Բաղդասարյանը:

2013թ. հունվարի 15-ին Երևանի Կենտրոն և Նորք-Մարաշ վարչական շրջանների դատարանի դատավոր Ալեքսեյ Սուքոյանը որոշում էր ընդունել Քոչարյանների հայցադիմումը վարույթ ընդունելու և գործը դատաքննության նախապատրաստելու մասին: ՀՀ նախկին նախագահի ու նրա որդու՝ Ռոբերտ ու Սեդրակ Քոչարյանների հայցադիմումը, որը ստորագրված է փաստաբան Արփինե Մելիքբեկյանի կողմից, դատարան էր ներկայացվել անցյալ տարվա դեկտեմբերի 27-ին: Քոչարյանները վիճարկում են 2012թ. նոյեմբերի 27-ին և 29-ին լույս տեսած «Ի՞նչ կապ ունեն Քոչարյանն ու Ծառուկյանը «Նաիրիտ»-ի հետ» և «Եվ Քոչարյանների րոպեավճարները» վերլուծական հոդվածները. հայցվորները պահանջում են իրենց պատիվն ու արժանապատվությունը արատավորող տեղեկությունները հերքել և հատուցել վնասը: