Փաստ ինֆո

Դիտավորությամբ առողջությանը ծանր վնաս պատճառելու, անչափահասին հանցանքի կատարմանը ներգրավելու, ավազակության և գողության համար ամբաստանյալի աթոռին է հայտնվել Վանաձոր քաղաքի բնակիչ Գագիկ Բունիաթյանը:

2011թ. դեկտեմբերի վերջերից մինչև 2012թ. հունվարի 25-ն ընկած ժամանակահատվածում նա ժամանակավորապես բնակվել է Աբովյան քաղաքի Երևանյան փողոցի թիվ 19 հասցեում գտնվող Բորիս Վարդանյանի տանը: Նախաքննությամբ պարզվել է, որ Գագիկ Բունիաթյանն այնտեղից հափշտակություն կատարելու դիտավորությամբ, նախ անչափահաս Արմեն Մաթևոսյանին խաբելով ու մոլորության մեջ գցելով, ցուցում է տվել սպասել Բ. Վարդանյանի տան բակում: Այնուհետև մուտք է գործել Բորիս Վարդանյանի տուն և այնտեղից հափշտակել մոտ 2 311 000 դրամ ընդհանուր արժողության տարբեր տեսակի կենցաղային իրեր:

Բացի վերոնշյալից, Գ. Բունիաթյանը 2012թ. փետրվարի 5-ին` ժամը 16:00-ի սահմաններում, Վլադիկ Հովհաննիսյանի` Աբովյան քաղաքի Ինտերնացիոնալ փողոցի 1-ին շենքի 18 բնակարանում ծագած վիճաբանության ընթացքում, մարմնական վնասվածքներ հասցնելու դիտավորությամբ, հարվածներ է հասցրել Արսեն Հակոբյանի մարմնի տարբեր հատվածներին, ինչպես նաև կծել է նրա աջ ականջը, որի հետևանքով առաջացել է աջ ականջախեցու վերին-հետին գալարի հարթ եզրերով բացակայություն և դեմքի անջնջելի այլանդակում:

Մեղադրական եզրակացության համաձայն` Գ. Բունիաթյանը կատարել է ևս մեկ հանցանք. 2012թ. փետրվարի վերջերին ուրիշի գույքը հափշտակելու դիտավորությամբ, խաբեությամբ ներկայանալով որպես ոստիկան, ապօրինի մուտք է գործել Հրաչ Զոհրաբյանին պատկանող ` Աբովյան քաղաքի 7-րդ փողոցի 9-րդ տուն, որտեղ դանակով վերջինիս կյանքի և առողջության համար վտանգավոր բռնություն գործադրելու սպառնալիքով, ավազակային հարձակմամբ հափշտակել է Հ. Զոհրաբյանի` մոտ 100 000 դրամ արժողության պարանոցի ոսկյա շղթան և մատի ոսկյա մատանին:

Վերոնշյալ արարքների համար Գ. Բունիաթյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասի, 175-րդ հոդվածի 2-րդ մասի 3-րդ և 4-րդ կետերի, 177-րդ հոդվածի 2-րդ մասի 2-րդ կետի և 165-րդ հոդվածի 1-ին մասով հատկանիշներով:

Նույն քր. գործի շրջանակներում ՀՀ քր օր.-ի 216-րդ հոդվածի («Ակնհայտ հանցավոր ճանապարհով ձեռք բերված գույք ձեռք բերելը կամ իրացնելը») 1-ին մասով մեղադրվում է նաև Կոտայքի մարզի Զառ գյուղի բնակիչ Արտակ Խաչատրյանը: Ըստ քրեական գործի նյութերի՝ նա հաստատապես տեղյակ լինելով Գագիկ Բունիաթյանի կողմից Հրաչ Զոհրաբյանից ավազակային հարձակմամբ հիշյալ ոսկյա շղթան ու մատանին հափշտակելու հանգամանքի մասին, 2012թ. մարտի սկզբներին Գագիկ Բունիաթյանից իրացնելու նպատակով վերցրել է վերջինիս կողմից ակնհայտ հանցավոր ճանապարհով ձեռք բերված նշված զարդերը ու դրանք իրացրել «Վաղարշ և որդիներ» ՍՊԸ-ի ոսկյա իրերի տոնավաճառում: