Փաստ ինֆո

Բուլղարիայի Ժողովրդական ժողովը (խորհրդարանը) այսօր ընդունել է հանրապետության վարչապետ Բոյկո Բորիսովի և նրա ղեկավարած կառավարության հրաժարականը: Երկրի օրենսդիր մարմնում ներկայացված  պատգամավորներից  «կողմ» են քվեարկել 209-ը, «դեմ»՝ 5-ը և ձեռնպահ է եղել մեկ հոգի: Այս մասին տեղեկացնում է ԻՏԱՌ-ՏԱՍՍ գործակալությունը։

Բուլղարիայի  վարչապետը նախօրեին հայտարարել էր, որ կայացրել է իր պաշտոնից  ամբողջ թիմով հեռանալու մասին որոշում՝ կապված բնակարանային և կոմունալ տնտեսությունում սպասարկման համար պահանջվող բարձր գների  դեմ բարձրացրած զանգվածային բողոքների հետ, որոնք, ի վերջո, հանգեցրել են ոստիկանության հետ արյունալի ընդհարումների:

Բուլղարիայի բնակիչների վարձի վճարները  վերջին  2 ամիսների ընթացքում  միջինը ամսական աճել են 50-100 տոկոսով: Առանձին դեպքերում էլեկտրաէներգիայի գինը անցած դեկտեմբեր և հունվար ամիսներին աճել է 100-ից  500 լևի (50-ից 250 եվրո): Սա այն դեպքում, երբ, օրինակ, երկրի խոշոր քաղաքների բնակիչների միջին աշխատավարձը տատանվում է 700-ից 1000 լեվի (350-ից 500եվրոյի)  միջև:

Ըստ օրենքի մոտ ժամանակներում  Բուլղարիայում խորհրդարանական մեծամասնություն կազմող կուսակցության կողմից պետք է ձևավորվի ծառայողական կառավարություն: Քանի որ «Բուլղարիայի  եվրոպական զարգացման  կողմ քաղաքացիներ» կառավարող  կուսակցությունը, որի նախագահը Բոյկո Բորիսովն է, հրաժարվել է ժամանակավոր կառավարությանը ցանկացած ձևով մասնակցելուց, ապա այդ իրավունքը անցնում է խորհրդարանում թվակազմով  երկրորդը ներկայացված քաղաքական  ուժին:

Եվ այսպես շարունակ՝ եթե առավել թվաքանակով պատգամավորական խմբակցությունները հրաժարվեն, ապա ժամանակավոր կառավարություն կազմելու իրավունքը կփոխանցվի օրենսդիրում թվակազմով հաջորդ  կուսակցության ներկայացուցիչներին: Իսկ եթե այդ դեպքում էլ կառավարություն չձևավորվեց, ապա երկրի նախագահ Ռոսեն Պլևնելիևը իր ցանկությամբ  կնշանակի ժամանակավոր կառավարության անդամներին, որոնց խնդիրը կլինի երեքամսյա ժամանակամիջոցում կազմակերպել խորհրդարանական ընտրություններ: