Փաստ ինֆո

Այսօր արդեն երրորդ օրն է, որ Հարավային Աֆրիկայի Հանրապետությունում դատարանը քննում է մեծ աղմուկ հանած Օսկար Փիստորիուսի գործը, որը մեղադրվում է իր ընկերուհու՝ մոդել Ռիվա Սթինկամպի սպանության մեջ:

Երկրում մեծ համբավ վայելող պարալիմպիական խաղերի չեմպիոն Փիստորիուսը, սակայն, պնդում է, որ ընկերուհու վրա ինքը կրակել է սխալմամբ: Քննության ընթացքում նա հայտարարել է, որ սիրում էր ընկերուհուն և կարծել է, որ կրակում է իր տուն մտած գողի վրա:

Մեղադրող կողմը հայտարարել է, որ Փիստորիուսը Ռիվա Սթինկամպի վրա կրակել է 3 անգամ, որն այդ պահին գտնվում էր լոգասենյակում:

Մինչ դատախազը ներկայացրել է իր մեղադրական ցուցմունքները՝ պարալիմպիական խաղերի վեցակի չեմպիոնն անընդհատ լաց է եղել: Նրա փաստաբանները նույնպես հաստատում են, որ այս ողբերգությունը տեղի է ունեցել դժբախտ հանգամանքների հետևանքով:

Գործը հետաքննող քննիչը հայտարարել է, որ դեռ չի գտել որևէ նշան, որը կհերքեր մեղադրյալի պնդումները:

BBC-ն այսօր տարածել է մի նոր սենսացիոն տեղեկատվություն, որի համաձայն մոդել Ռիվա Սթինկամպի սպանության մեջ կասկածվում է, ոչ այլ ոք, եթե ոչ... այն խուզարկուն, ով զբաղվում է այդ սպանության գործով:

Հարավային Աֆրիկայի Հանրապետության ոստիկանությունը հայտնել է, որ խուզարկու Հիլթոն Բոթան մասնակցել է հարբածների կողմից կազմակերպված հրաձգության միջադեպին: Այդ միջադեպի ժամանակ երեք ոստիկաններ ալկոհոլային խմիչքի ազդեցության տակ երթևեկել են պետական ավտոմեքենայով և կրակել ուղևորներ տեղափոխող միկրոավտոբուսի վրա:

Անորոշ է, թե դա ե՞րբ է տեղի ունեցել: Որոշ ԶԼՄ-ներ այդ դրվագը վերագրում են 2009թ.-ին: Հարավաֆրիկյան «Eyewitness News» հեռուստաալիքը, հղում անելով ոստիկանությանը, պնդում է, որ այդ երեք հարբածներին ձերբակալել են 2011թ.-ին: Դրանով գործը փակվել է: Բայց ավելի ուշ այն կրկին վերականգնվել է:

«Eyewitness News» հեռուստաալիքը տեղեկացնում է, որ Բոթոն և մյուս երկու ոստիկանները դատարանի առջև կկանգնեն մայիս ամսին:

Իսկ մինչ այդ, Փիստորիուսը, որին կասկածում են կանխամտածված սպանություն կատարելու մեջ, ասում է, որ իր ընկերուհուն գնդակահարել է սխալմամբ: Դատարանը հինգշաբթի կշարունակի այս գործի քննությունը: