Փաստ ինֆո

Ոստիկանների նկատմամբ խուլիգանության, բռնություն գործադրելու, ինչպես նաև սառը զենք պահելու մեջ մեղադրվող Արմեն Խալոյանն այսօր հայտարարեց, որ «շինծու քրեական գործով» մեղադրական եզրակացությունը դավադրություն է իր դեմ:

Երևանի Կենտրոն և Նորք-Մարաշ վարչական շրջանների դատարանում՝ դատավոր Մնացական Մարտիրոսյանի նախագահությամբ, այսօրվա դատական նիստում նա հայտարարեց նաև, որ նախաքննության ընթացքում զրկված է եղել ՀՀ քրեական դատավարության օրենսգրքի 65-րդ հոդվածով երաշխավորված իր բոլոր իրավուքներից, այդ թվում՝ պաշտպան ունենալու իրավունքից, իրեն անգամ չեն տրամադրվել իր դեմ հարուցված գործի նյութերը:

Ամբաստանյալը հայտարարեց, որ ինքը բռնություն չի գործադրել ՀՀ ոստիկանության պետի խորհրդական Մերուժան Հակոբյանի նկատմամբ, «չեմ կծել նրա գլուխը, ո՞նց կարող եմ գլուխը կծել՝ ես հո գայլ չեմ»: Հակառակը՝ ոստիկանն է գրիչն իր ուղղությամբ նետել և դրանով վերին շրթունքի հատվածում վնաս պատճառել: Ոստիկանության Արաբկիրի բաժնում էլ իրեն են ապտակել, իսկ ինքը ձեռքը պարզելով՝ ընդամենը փորձել է թույլ չտալ, որ էլի հարվածեն: «Ոստիկանությունում մարդկանց են ծեծում, ոչ թե հակառակը՝ մարդիկ են ոստիկաններին ծեծում: Երդվում եմ սրբություններով՝ ես դա չեմ արել»,- ասաց նա:

Ամբաստանյալը հերքեց նաև սառը զենք պահելու և կրելու մեղադրանքը՝ ինքն անօթևան է և դանակն օգտագործում է բացառապես կենցաղային նպատակներով: Ըստ նրա, իր դեմ մեղադրանքին չեն հավատում անգամ կալանավայրի հեղինակավոր բնակիչները, ասելով՝ «եթե դու այսքան բան արած լինեիր, գլխներիս վրա ման կտայինք»:

Դատարանը բավարարեց պաշտպանական կողմի միջնորդությունները որպես վկաներ լրագրող Ա.Սուլեյմանյանին և դատաբժշկական փորձագետ Ա.Խաչատրյանին հարցաքննելու մասին, նրանք կհրավիրվեն մարտի 5-ի դատական նիստին:

Հիշեցնենք, որ ըստ մեղադրանքի, Ա.Խալոյանը 2012թ. հոկտեմբերի 25-ին, ժամը 16.45-ի սահմաններում ՀՀ ոստիկանության վարչական շենքի ընդունարանում ՀՀ ոստիկանապետի մոտ ընդունելություն կազմակերպելու հարցի շուրջ վիճաբանել է ՀՀ ոստիկանության պետի խորհրդական Մերուժան Հակոբյանի հետ, որի ընթացքում կոպիտ կերպով խախտել է հասարակական կարգը՝ հասարակության նկատմամբ անհարգալից վերաբերմունք է դրսևորել, աղմկել և հայհոյել, բռնություն գործադրել՝ ձեռքերով հարվածներ է հասցրել Մ.Հակոբյանին ու նրան պատճառել առողջության թեթև վնասի հատկանիշներ չպարունակող մարմնական վնասվածք: Ընդհանուր առմամբ, «իր այդ դիտավորյալ գործողություններով շուրջ 20 րոպե տևողությամբ խաթարել է ոստիկանության ծառայողների բնականոն աշխատանքը»: