Փաստ ինֆո

ՀՀ քրեական և զինվորական գործերով վերաքննիչ դատարանը (նախագահող դատավոր` Կարինե Ղազարյան) այսօր վերսկսեց Մարտունու դիրքերից մեկում սպանված վեց զինծառայողների գործով Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի` բողոքը քննության առնելու մասին 08.01.2012թ. որոշման դեմ տուժողներից երկուսի իրավահաջորդների և նրանց ներկայացուցիչ, իրավապաշտպան Արթուր Սաքունցի բերած վերաքննիչ բողոքի քննությունը:

Հիշեցնենք, որ նախորդ նիստում  տուժողների իրավահաջորդների իրավունքների արդյունավետ դատական պաշտպանության համար Ա.Սաքունցը  միջնորդել էր հնարավորություն ընձեռել  ծանոթանալու պաշտպանության նախարարի մի գաղտնի հրամանի եւ դատարանն այդ կապակցությամբ դիմել էր ՀՀ պաշտպանության նախարարին։ Այսօրվա նիստում  դատավորը տեղեկացրեց, որ նախարարը մերժել է եւ գաղտնի հրամանը չի գաղտնազերծվել, ինչը կապակցությամբ Ա. Սաքունցը հայտարարեց, որ  գտնվում են  ակնհայտ անհավասար պայմաններում:

Անդրադառնալով սպանության հանգամանքների պաշտոնական նկարագրին սպանված զինծառայողների ստացած հրազենային վնասվածքների դարձյալ պաշտոնապես արձանագրված պատկերի, մասնավորապես` զինվորների մարմինները խոցած գնդակների ուղղությունների անհամապատասխանության խնդրին, իրավապաշտպանը մանրամասնորեն ներկայացրեց առկա փաստերը, որոնք ինչպես նախորդ, այնպես էլ այսօրվա նիստում քննիչ Մուշեղ Բուլղադարյանի և զինվորական դատախազությունից դատախազ Արամ Խաչատրյանի կողմից որևէ առարկության կամ բացատրության չարժանացան: Մինչդեռ շատ հետաքրքիր կլիներ հիշյալ անհամապատասխանության վերաբերյալ նրանց պարզաբանումը լսելը:

Ըստ Ա. Սաքունցի, զինծառայող Կարո Այվազյանը, գոյություն ունեցող փաստաթղթի համաձայն, պետք է ոչ շարային ծառայություն անցներ, սակայն ընդգրկվել է շարային ծառայության մեջ, իսկ նախաքննությունն այդ խնդրին որևէ իրավական գնահատական չի տվել: Մինչդեռ, եթե նա շարային ծառայության մեջ ընդգրկված չլիներ, հիշյալ ողբերգությունը չէր լինի:

Իրավապաշտպանի հավաստմամբ, նախաքննության մարմնի կողմից շրջանցվել կամ պատշաճ քննության չեն արժանացել ծառայակից զինծառայողների այն բացատրությունները, ցուցմունքները, որ «իրար խփել են», «իրար կոտորում են», «իրար փրթում են», այսինքն` վկաները, ըստ էության, իրենց ցուցմունքներում ասում են ոչ թե այն մասին, որ ինչ-որ մեկը մեկին կրակել է, այլ հայտնել են իրար խփելու մասին, ինչը բնավ չի հիմնավորում, որ Կարո Այվազյանը հինգ զինծառայողներին խփել է: Դա նշանակում է, որ ոչ թե ինչ-որ մեկը կրակել է մյուսների վրա, այլ առնվազն կրակոցներ են եղել:

ՈՒղղակիորեն թե անուղղակիորեն` վերոնշյալի մասին է վկայում նաև դեպքի վայրում գտնված և գործում թիվ 19 փաթեթով առկա պարկուճը, որը փորձաքննությամբ այդպես էլ չի պարզվել, թե որ զենքից է կրակված եղել:

Չնայած տուժողների իրավահաջորդների ներկայացուցչի բերած վերոնշյալ և այլ փաստարկներին, ինչպես նաև պնդմանը, որ քրեական գործով իսկապես չեն պարզված դեպքի հանգամանքները, իրականությունը, չի հիմնավորվում, որ մեկ անձի կողմից են կատարվել այդ բոլոր սպանությունները, մի շարք հարցեր պարզաբանված չեն, դրանց բացատրություն չի տրված, բազմակողմանի և օբյեկտիվ քննություն չի կատարվել, ՀՀ քրեական և զինվորական գործերով վերաքննիչ դատարանը քննության առնելով Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի հիշյալ որոշման օրինականության, հիմնավորվածության հարցը, վերաքննիչ բողոքը մերժեց և առաջին ատյանի դատարանի` բողոքը քննության առնելու մասին որոշումը թողեց ուժի մեջ:

2013 թ. հունվարի 8-ին Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը մերժել է սպանված զինծառայողներ Ռոբերտ Հովհաննիսյանի, Անդրանիկ Սարգսյանի իրավահաջորդների և նրանց ներկայացուցիչ, իրավապաշտպան Արթուր Սաքունցի դիմումը` ՀՀ պաշտպանության նախարարության ՀԿԳ քննչական բաժնի ՀԿԳ ավագ քննիչ Մուշեղ Բուլղադարյանի 2012 թ. հուլիսի 28-ի` քրեական հետապնդում չիրականացնելու և քրեական գործի վարույթը կարճելու մասին որոշումը վերացնելու պահանջի մասին: Ըստ դիմողների, նշված որոշումը վերացնելուց հետո անհրաժեշտ է իրականացնել բազմակողմանի քննություն և քրեական հետապնդում սկսել սպաներ Սամվել Գևորգյանի և Վիգեն Պետրոսյանի նկատմամբ:

Դատարանի որոշման հրապարակումից հետո տուժողների իրավահաջորդներ Սվետլանա Կարապետյանը (սպանված զինծառայող Անդրանիկ Սարգսյանի մայրը), Միքայել Հովհաննիսյանը (սպանված զինծառայող Ռոբերտ Հովհաննիսյանի հայրը), ինչպես նաև նրանց շահերի ներկայացուցիչ Արթուր Սաքունցը մեզ հետ զրույցում տեղեկացրին, որ վճռաբեկ բողոք են ներկայացնելու ՀՀ վճռաբեկ դատարան:

- Մեր հարցերը, որոնց պատասխանները չկան, վերցված են հենց քրեական գործի նյութերից,- ասաց Ա. Սաքունցը:- Դատարանը հիմք ընդունեց ոչ թե մեր բողոքը, այլ այն ընդհանրական բնույթի մեկնաբանությունները, թե քրեական գործի մեջ ամեն ինչ կա:

Հեղինակ` Արթուր Հովհաննիսյան