Փաստ ինֆո

Խաչատուր Աբովյանի անվան մանկավարժական համալսարանի նախկին իրավաբան Զավեն Մարկոսյանի կողմից խաբեությամբ իրավաբանական ֆակուլտետի ուսանողներից ուսման վարձերը զեղչված վճարելու պատրվակով գումարներ վերցնելու գործով այսօր Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Գագիկ Պողոսյանի նախագահությամբ, վկաներին բերման ենթարկելու որոշում կայացրեց:

Մինչ այդ ամբաստանյալը հայտարարեց, որ իրեն մեղավոր չի ճանաչում առաջադրված մեղադրանքում և որ իր պաշտպանությունը կիրականացնի ինքնուրույն:

Դատարանի սահմանած ապացույցների հետազոտման կարգի համաձայն՝ նախ ցուցմունքներ տվեցին տուժողները:

Տուժող Լևոն Թովմասյանը հայտնեց, որ հեռակայելով Խ. Աբովյանի անվան մանկավարժական համալսարանի իրավաբանական ֆակուլտետում՝ 2012թ. հունվարին առաջին կուրսի երկրորդ կիսամյակի ուսման վարձը 25 տոկոսով զեղչված վճարելու համար ամբաստանյալն իրենից պահանջել է համապատասխան փաստաթղթեր, ըստ որի՝ տուժողն ունի երկու երեխա և երկրորդ երեխայի 1 տարին դեռ չի լրացել, որի հիման վրա էլ ուսման վարձը կզեղչվեր:

Մինչև երկրորդ երեխայի 1 տարին լրանալը, այսինքն՝ հունվարի 16-ը, տուժողը համապատասխան փաստաթղթերը հանձնել է ամբաստանյալին, իսկ որոշ ժամանակ անց վերջինս իրենից պահանջել է նաև ուսման վարձը:

Կիսամյակի համար վճարվող գումարը կազմում է 240 000 դրամ, տուժողն արդեն իսկ զեղչված՝ 180 000 դրամի չափով տվել է ամբաստանյալին, վերջինս էլ իր հերթին տուժողին խոստացել է ապրիլին տալ վճարված գումարի անդորրագիրը:

Սակայն ինչպես հետագայում պարզվել է՝ ամբաստանյալն ուսման վճարի զեղչի համար պահանջվող փաստաթղթերը չի ներկայացրել դեկանատ, ինչպես նաև տուժողի կողմից իրեն տված գումարը ևս չի վճարել: Տուժողը պարզել է նաև, որ ամբաստանյալը ազատվել է աշխատանքից: Նա ամբաստանյալից պահանջել է իր տված գումարը, ամբաստանյալը պատասխանել է, որ ծախսել է այն, բայց կվերադարձնի:

Որոշ ժամանակ անց՝ վերջիններիս միջև տեղի ունեցած հեռախոսազրույցի ժամանակ, ամբաստանյալը տուժողին ասել է, որ գործընթացը չի ստացվել, սակայն ինքը պատրաստ է մուծել ուսման վարձի այն մասը, որը պետք է զեղչվեր, այսինքն՝ 60 000 դրամը, որը, սակայն, այդպես էլ չի մուծել: Ավելին՝ մինչ այսօր նա չի վերադարձրել նաև տուժողի կողմից իրեն տված գումարը:

Ըստ տուժող Գևորգ Խաչատրյանի ցուցմունքի՝ ամբաստանյալն իրեն խոստացել էր զեղչել ուսման վարձը՝ այս անգամ 4 անչափահաս երեխա ունենալու հիմքով: Գևորգ Խաչատրյանը 2012թ. հունվարին համապատասխան փաստաթղթերը տրամադրել էր ամբաստանյալին, նաև նրան տվել 180 000 դրամ, սակայն երկրորդ կիսամյակի ուսումնական տարվա սկզբին՝ ապրիլին, համալսարանում պարզել էր, որ իր ուսման վարձը զեղչվել է ոչ թե 25, այլ 20 տոկոսով, իսկ իր կողմից տրված ուսման վարձը ամբաստանյալի կողմից չի վճարվել: Իր այն հարցին, թե ամբաստանյալն ինչու չի վճարել գումարը, վերջինս նշել է, որ կվճարի օրերս, սակայն այդպես էլ չի վճարել:

Մարտի 11-ի դատական նիստում կսկսվի վկաների հարցաքննությունը: