Փաստ ինֆո

«Այսօր ակնհայտ է Հայաստանի Հանրապետությանը և ողջ հայ ժողովրդին, որ հայ ժողովուրդը 80-ը 20-ի դիմաց երեկ տոնել է, նշել է և իրացնելու է մեր ազգային քաղաքացիական հաղթանակը: Եվ ոչ ոք, ինչպես ասել եմ, մեր ձեռքից, մեր խղճից, մեր սահմանադրական իրավունքից չի վերցնելու այդ հաղթանակը: Դա պատկանում է ոչ թե Րաֆֆիին, կամ Սերժին, կամ մնացացին, այլ` համայն հայությանը, մեր բոլոր քաղաքացիներին»,- այսօր Ազատության հրապարակում հավաքված իր համակիրների և ընտրողների առջև ելույթ ունենալով` հայտարարեց ՀՀ նախագահի թեկնածու Րաֆֆի Հովհաննիսյանը` հավելելով, որ ոչ ոք թող չհանդգնի խլել այդ իրավունքը ժողովրդից:

Ր.Հովհաննիսյանը նշեց նաև, որ քվեարկության ավարտից հետո` կեսգիշերին, դիմել է ՀՀ գործող նախագահ Սերժ Սարգսյանին. «Ես կոչ արեցի երեկ, որ ինքը դառնա առաջին Նախագահը 20 տարվա ընթացքում, ով ունի այնքան ներուժ, իրավունք, ողնաշար, բարոյականություն` ընդունելու ժողովրդի հաղթանակը: Ցավոք սրտի, մինչև հիմա նա չկարողացավ դա անել»: Նա ընդգծեց, որ դեռևս ուշ չէ. վաղը Ազատության հրապարակում կայանալու է համազգային հանրահավաք, և մինչ այդ ինքը հրավիրում է Սերժ Սարգսյանին հրապարակային կամ մասնավոր հանդիպման, որպեսզի միասին կազմակերպեն «իշխանության փոխանցումը Հայաստանի ժողովրդին»:

«Ես ուզում եմ սեղմել Սերժ Սարգսյանի ձեռքը և մինչև ժամը 5-ը ընդունել իր շնորհավորանքը Հայաստանի ժողովրդի հաղթանակի առնչությամբ: Մինչև վաղը ժամը 5-ը ով ունի խոստովանանք, թող խոստովանի` դա Նախագահ է,Ազգային ժողովի նախագահ է թե պատգամավոր, վարչապետ թե նախարար, դատավոր, մարզպետ, գյուղապետ, հրամանատար, ով մինչև ժամը 5-ը խոստովանի իր սխալը Հայաստանի Սահմանադրության, օրենքի և հայ ժողովրդի առջև ներում կստանա ժողովրդից, իսկ եթե ոչ` պատասխան կտա»,-հայտարարեց Րաֆֆի Հովհաննիսյանը:

Պատասխանելով լրագրողների հարցերին` նա նշեց, որ բոլորը գիտեն, որ այն, ինչ  հրապարակվել է Կենտրոնական ընտրական հանձնաժողովի կողմից որպես նախնական տվյալ, «դա սուտ թվաբանություն է, և որ Հայաստանի ժողովուրդը 20 տարվա ընթացքում առաջին անգամ հաղթել է»: Ըստ Ր.Հովհաննիսյանի, գործող Նախագահը ևս գիտի, որ «սրանք անազատ,անարդար ընտրություններ են»: