Փաստ ինֆո

«Հասկանում եմ, որ իշխանությունները համառորեն շարունակում են պարզապես խլել իմ՝ առանց այդ էլ ոչ մեծաթիվ ձայները։ Ընտրակաշառքներ, լցոնումներ, կրկնաքվեարկություններ, խայտառակ ցուցակներ։ Մենք դեռ կքննարկենք պաշտոնապես բողոքարկելու խնդիրը»,- Facebook-ի իր էջում գրել է ՀՀ նախագահի թեկնածու, նախկին վարչապետ Հրանտ Բագրատյանը:

Վերջինիս հավաստմամբ՝ իրենց ձեռքի տակ եղած արձանագրություններից միայն մի քանիսն են 5%-ից պակաս, դրանք հիմնականում տատանվում են 5-8%-ի շրջանակներում։ Հ. Բագրատյանը նշելով, որ իրեն ինչ-որ թիվ են տալիս (2%)՝ բավականին ցածր, շարունակել է. «Առաջին հայացքից սա պարտություն է։ Իրականում, սակայն, ես հպարտ եմ այդ 30000 ձայնի համար»:

Այս կապակցությամբ Հ. Բագրատյանի նախընտրական կենտրոնական շտաբի ղեկավար Արշակ Ավագյանին այսօր խնդրեցինք իր կարծիքը, գնահատականն արտահայտել արդեն ավարտված ընտրությունների վերաբերյալ:

- Պարոն Բագրատյանի Facebook-ի էջում ամեն ինչ գրված է, ես ավելացնելու ոչինչ չունեմ,- ասաց նա:

Պատասխանելով մեր հարցին, թե Հ. Բագրատյանն արդյոք պաշտոնապես բողոքարկելո՞ւ է ընտրության արդյունքները, պարոն Ավագյանն ասաց.

- Մենք դեռ չենք քննարկել այդ հարցը, պաշտոնապես բողոքարկելու խնդիրը կքննարկենք, նոր միայն կկարողանամ պատասխանել: Մենք ունենք արձանագրություններ, խախտումների վերաբերյալ բավական շատ տեղեկատվություն:

Բնականաբար, հարց է առաջանում, թե այդ շատ տեղեկատվությունը փաստարկվա՞ծ է արդյոք, ապացույցներ կա՞ն: Այս կապակցությամբ շտաբի ղեկավարն ասաց.

- Արձանագրություններ ունենք կազմած, իհարկե: Ես չգիտեմ, մենք դեռ պետք է քննարկենք, եթե դիմում ենք, վերջիվերջո ինչ է լինելու: Դատարանում, այո, դա կապացուցվի, բայց, ինչպես միշտ, գիտեք ինչպես է արվում: Դա ընտրությունների արդյունքների վրա կարող է չազդել, այսինքն` դիմելու-չդիմելու նպատակահարմարության հարցը դեռ պետք է որոշել, պարզել, թե մեր ունեցած տեղեկատվությունն արդյոք կբավականացնի՞ ինչ-որ արդյունքի հասնելու համար:

Արշակ Ավագյանի տեղեկացմամբ՝ արձանագրությունները, որոնք ուսումնասիրելու են, տեղերից ստացվելու են այսօր և վաղը, դրանք ուսումնասիրելու են իրենց իրավաբանների հետ, այսինքն` բողոքարկել-չբողոքարկելու հարցն այսօր դեռ չի որոշվելու:

- Այդ արձանագրությունները, ենթադրենք, մենք ասպարեզ բերեցինք, ու Հրանտ Բագրատյանի ստացած քվեներն ավելացան ևս մի քանի տոկոսով, բան չի փոխվում ախր, դեռ չեմ կարող ասել, թե ինչ կորոշվի, բայց երևույթը դատապարտելի է, մենք դրա մասին առաջիկայում դեռ հայտարարություն կանենք,- ասաց շտաբի ղեկավարը և հավելեց, որ, իրենց տվյալներով, մոտ 15 արձանագրություն է կազմվել, հիմնականում` Արարատի մարզի ընտրատեղամասերում: