Փաստ ինֆո

Հայաստանում երեկ տեղի ունեցան ժողովրդավարական չափանիշներին համահունչ նախագահական ընտրություններ, որոնք կազմակերպվել էին բարելավված իրավական դաշտում:

Նախօրեի Հայաստանի նախագահի ընտրությունների վերաբերյալ այսօր այսպիսի գնահատական տվեց ԵԱՀԿ Խորհրդարանական Վեհաժողովի դիտորդական առաքելության ղեկավար Տոնինո Պիցուլան: Նա ընդգծեց, որ այս տարվա ընտրությունները՝ չնայած որոշ խնդիրների, որոնք կառավարությունը և օրենսդիր մարմինը պարտավոր են լուծել, առկա է նաև օրենսդրության բարելավում, լրատվամիջոցների անաչառ լուսաբանում, ինչը «լուրջ քայլ է դեպի առաջ»:

Ըստ ԵԱՀԿ ԽՎ դիտորդների՝ քարոզարշավի ընթացքում հավաքների ու արտահայտվելու հիմնարար ազատություններն ընդհանուր առմամբ պահպանվել են, լրատվամիջոցներն ապահովել են հավասարակշիռ լուսաբանում: Այդուհանդերձ, առկա թեկնածուների սահմանափակությունը «նեղ ընտրություն է թողել ընտրողներին»: Քարոզարշավին մասնակցող թեկնածուները կարողացել են ազատորեն քարոզարշավ իրականացնել, ներկայացնել իրենց տեսակետները, բայց ընդհանուր առմամբ քարոզարշավը հետաքրքրության չի արժանացել հասարակության կողմից: Թեկնածուների միջև ուղղակի բանավեճերի իսպառ բացակայությունը և քննադատական լրագրության սահմանափակությունն, ըստ առաքելության ղեկավարի, ընտրողների համար դժվարացրել են քաղաքական ծրագրեր համեմատելը և հակադրելը, իսկ մի շարք քաղաքական կուսակցությունների կողմից ընտրություններին թեկնածուներ չառաջադրելն, ըստ երևույթին նպաստել է անտարբերությանը և ընտրողների շրջանում վստահության պակասին:

«Մենք նաև նկատեցինք, որ հստակորեն չեն սահմանազատվել գործող նախագահի քարոզարշավը և պետական կառույցների ընթացիկ գործունեությունը, այդ թվում՝ տեղի են ունեցել վարչական ռեսուրսների չարաշահումներ և ճնշումներ, որպեսզի հանրային ծառայողները մասնակցեն ընտրությանը և քարոզարշավին առնչվող միջոցառումներին»,- ասաց Տ. Պիցուլան: Նա ընդգծեց, որ ոստիկանությունը զգալի ջանքեր է գործադրել ընտրացուցակը բարելավելու ուղղությամբ, բայց այդուհանդերձ «լայնորեն հանդիպում են անճշտությունների մասին հաղորդումներ», իսկ, շատ շահագրգիռ սուբյեկտներ, քաղաքացիական հասարակության ներկայացուցիչներ և թեկնածուներ նշել են, որ կա անճշտությունները չարաշահելու հնարավորություն: «Այս խնդիրը Հայաստանում վաղուց կա, բայց դրա լուծման համար նպատակային քաղաքական կամք է պահանջվելու»,- ասաց առաքելության ղեկավարը:

Ըստ միջազգային դիտորդների՝ քվեարկության գործընթացը լավ է կազմակերպվել դիտարկված տեղամասերի մեծ մասում, այնուհանդերձ, արձանագրվել են կազմակերպչական բնույթի որոշ խնդիրներ և մեկ ավելի լուրջ խախտում՝ ինչպես խորհրդարանական ընտրությունների ժամանակ, այս անգամ ևս անձնագրերի թանաքոտումը չի պաշտպանել կրկնակի քվեարկությունից՝ թանաքը հեշտորեն կարող էր մաքրվել:

Տ.Պիցուլան ձեռնպահ մնաց համեմատել Հայաստանի ընտրությունները հարևան Վրաստանի ընտրությունների հետ. «Յուրաքանչյուր պետություն այլ իրավիճակում է գտնվում, խրթին կլիներ համեմատելը, իհարկե, ես կուզենայի տեսնել, որ այս ընտրությունը քայլ լիներ դեպի առաջ տարածաշրջանի և նրա կայունության համար, ուզում եմ հավատալ, որ այդպես էլ կլինի»:

Երկուսուկես մլն հաշվառված ընտրողներից մոտ 700 հազարի արտերկրում գտնվելու խնդիրը մնում է, ասաց Տ.Պիցուլան, սակայն «եթե ճիշտ եմ տեղեկացված, խնդիրը լուծելու մեկ-երկու փորձ կառավարության կողմից եղել է, մենք չենք տեսել կամ հաղորդում չենք ստացել, որ այս ընտրության ժամանակ դա կարող էր լինել լուրջ խնդիր»:

Առաքելության ղեկավարն ընդգծեց, որ նախորդ ընտրությունների համեմատ մի քիչ ավելի ցածր է ընտրություններին ընտրողների մասնակցության մակարդակը, դա ակնհայտ ուղերձ է ոչ միայն իշխանություններին, որն ամենաշատն է պատասխանատու երկրում առկա իրավիճակի համար, այլև ընդդիմությանը, որ «իրեն այլ կերպ պահի, միգուցե հաջորդ ընտրությանը»:

Տոնինո Պիցուլան խորին երախտիք հայտնեց իշխանություններին և ժողովրդին՝ «մեզ ջերմորեն ընդունելու և մեզ հետ համագործակցելու համար»: