Փաստ ինֆո

- Նախընտրական քարոզարշավի ընթացքում տեղի ունեցած ընտրախախտումների վերաբերյալ ստացված տեղեկություններով ոստիկանությունում քննարկվել և քննարկման փուլում է գտնվում 96 դեպք, որից 63-ը` ընտրակաշառքի, 16-ը` քարոզարշավը խոչընդոտելու, 12-ը` ընտրողի կամքի ազատ իրականացմանը խոչընդոտելու, 1-ը` զրպարտչական տեղեկություններ տարածելու, 3-ը` ընտրությունները կամ քվեարկության արդյունքները կեղծելու, և 1-ը` քվեարկությանը նախորդող օրը քարոզչություն կատարելու վերաբերյալ,- այսօր ՀՀ ոստիկանությունում հրավիրված մամուլի ասուլիսում տեղեկացրեց ոստիկանության շտաբի պետ, գեներալ- մայոր Վարդան Եղիազարյանը:

Ըստ շտաբի պետի, հիշյալ 96 դեպքից 45-ի վերաբերյալ ահազանգեր են ստացվել նախագահի թեկնածու Հովհաննիսյանի, երկուական` Հայրիկյանի և Բագրատյանի, մեկական` Հարությունյանի և Սարգսյանի նախընտրական շտաբներից, 43 ահազանգ ստացվել է քաղաքացիներից` լրատվամիջոցներով, հեռախոսակապով կամ այլ կերպ, որոնցից 30-նն իրենց տվյալները չեն հայտնել, իսկ 2 դեպք հայտնաբերվել է ոստիկանության ծառայողների կողմից:

- Ստացված ահազանգերի որոշ մասը եղել է անհասցե և անփաստարկ, այնուամենայնիվ, բոլորով կազմակերպվել են համապատասխան գործողություններ, ստուգումներ են իրականացվել, ստեղծվում են նյութեր, և կտրվի դրանց իրավական գնահատականը, կլուծվի դրանց ընթացքը,- ասաց Վարդան Եղիազարյանը:- Հարկ է նշել, որ մի շարք դեպքերում հայտարարություն կամ տեղեկատվություն տրամադրող աղբյուրները հրաժարվել են լրացուցիչ տեղեկատվություն տալուց, ինչը, իհարկե, բարդություններ է առաջացրել ոստիկանության աշխատակիցների աշխատանքներում, սակայն մենք ավելի մանրաքնին ենք վերաբերվում ընտրության հետ կապված այս բոլոր միջադեպերին, դրանց նախաքննության և հետաքննության նյութերը կազմելիս` ավելի խորացված, և գնահատականները տրվում են ավելի լուրջ հիմքեր ստեղծելով:

Շտաբի պետի տեղեկացմամբ՝ նշված 96 դեպքից ստուգման ենթակա տեղեկատվությամբ նախապատրաստվել է 10 նյութ, սակայն դրանց անհիմն լինելու պատճառով, եզրակացությամբ թողնվել է անհետևանք, 30 դեպքում որոշում է կայացվել քրեական գործի հարուցումը մերժելու մասին, որից 28-ը` հանցադեպի, իսկ 2-ը` հանցակազմի բացակայության պատճառաբանությամբ:

- 56 դեպքով նախաքննության և հետաքննության մարմինների կողմից նախապատրաստվում են համապատասխան նյութեր, որոնցից մեկ դեպք ոստիկանության Կոտայքի մարզային վարչությունից ուղարկվել է Հատուկ քննչական ծառայություն, մեկ դեպքում էլ նյութերն ուղարկվել են Կոտայքի մարզի դատախազություն` ենթակայության հարցը լուծելու համար,- ասաց Վ. Եղիազարյանը:

Շտաբի պետի տեղեկացմամբ՝ ՀՀ ոստիկանությունում շուրջօրյա գործող բազմաուղի թեժ գծով ընտրությունների օրը ստացվել է ընտրությունների հետ կապված շուրջ 36 հաղորդում, դրանցից 18-ը ներգրավվել է շտաբի համապատասխան ցուցակներում և դրանցով կատարվում են ստուգումներ, 6-ն ուղղորդվել են անձնագրային և վիզաների վարչություն, 9-ի վերաբերյալ հաղորդումները փոխանցվել են ԿԸՀ, 6-ով տրամադրվել է խորհրդատվություն, դրանք տեղեկատվական բնույթի հարցեր են եղել, մեկն ուղարկվել է ճանապարհային ոստիկանություն:

- Գործել է նաև թեժ գիծ` միջազգային դիտորդական առաքելությունների համար,- ասաց Վ. Եղիազարյանը:- Ի դեպ, այդ թեժ գծով ոչ մի ահազանգ չի ստացվել, ինչն, իհարկե, հաճելի է մեզ համար:

ՀՀ ոստիկանության պետի առաջին տեղակալ, ոստիկանության գեներալ-մայոր Հունան Պողոսյանի գնահատմամբ՝ արդեն կայացած նախագահական ընտրություններում ոստիկանություն-լրատվամիջոցներ համագործակցությունն աննախադեպ է եղել, աննախադեպ է եղել նաև այդ համագործակցության արդյունավետությունը: Ըստ նրա, չկա զանգվածային լրատվամիջոցներում հրապարակված մի հաղորդագրություն կամ ահազանգ՝ որին ոստիկանությունն օպերատիվ կերպով արձագանքած չլինի, չկան անպատասխան մնացած հարցեր և հարցապնդումներ:

Կատարված աշխատանքների հաշվետվությամբ հանդես եկավ նաև ՀՀ ոստիկանության պետի տեղակալ, ոստիկանության գեներալ-մայոր Արթուր Օսիկյանը: Նա մանրամասն ներկայացրեց ընտրողների ռեգիստրի, ընտրացուցակների ճշտման ուղղությամբ իրենց կատարած աշխատանքը, դրա հիմնական ուղղությունները:

- 2013 թվականի փետրվարի 18-ին, ընտրությունների ընթացքում արձանագրվել են և ինչպես ինտերնետային կայքէջերից, այնպես էլ ոստիկանությունում գործող բազմուղի թեժ գծից ստացվել են 104 ահազանգեր և հաղորդումներ,- ասաց ՀՀ ոստիկանության իրավաբանական վարչության պետ Թաթուլ Պետրոսյանը:- Այդ 104 ահազանգերից և հաղորդումներից 41-ն արձանագրվել են Երևանում, 63-ը` հանրապետության տարբեր մարզերում: Նշված 104 դեպքերից 37-ը վերաբերվել է ընտրությունների ընթացքում կաշառք ստանալու կամ կաշառք տալու դեպքերին:

Թաթուլ Պետրոսյանի տեղեկացմամբ՝ ընտրությունների օրը հարուցվել է 2 քրեական գործ` մեկը ոստիկանության Շենգավիթի քննչական բաժնում, մեկն էլ` Էրեբունու բաժնում: Երկու քր. գործն էլ հարուցվել են կրկնակի քվեարկություն կատարելու փաստի առթիվ, ՀՀ քրեական օրենսգրքի 153-րդ հոդվածի և 34-153-րդ հոդվածի հատկանիշներով:

Իրավաբանական վարչության պետն անդրադարձավ նաև լրագրողների մասնագիտական գործունեության հետ կապված դեպքերին: Ընտրությունների օրը կայքէջերով ոստիկանության ստացած տեղեկությունների համաձայն` արձանագրվել է այդպիսի չորս դեպք, որոնցից մեկը` Երևանի Էրեբունի շրջանում (ըստ ստացված տեղեկատվության, խոչընդոտվել է Մարինե Խառատյանի և Գայանե Սարիբեկյանի մասնագիտական օրինական գործունեությունը), մեկ դեպք` Գյումրիում, մեկ դեպք` Երևանի Մալաթիա-Սեբաստիա վարչական շրջանում («Առավոտ»-ի լրագրող Հռիփսիմե Ջեբեջյանի նկատմամբ), մեկ դեպք էլ` Արտաշատի շրջանում («Իրավունք» թերթի լրագրող Էլմիրա Մարտիրոսյանի նկատմամբ): Ոստիկանապետի առաջին տեղակալի հավաստմամբ՝ բոլոր դեպքերի առնչությամբ էլ մանրամասն ուսումնասիրություն կիրականացվի, մեղավորները խստորեն կպատժվեն: