Փաստ ինֆո

ՀՀ նախագահի թեկնածու Վարդան Սեդրակյանի նախընտրական շտաբն այսօր չի աշխատում:

- Այսօր մենք ընդհանրապես չենք հետևում ընտրություններին, որովհետև հետևելն էլ արդեն ծիծաղելի է. բոլորս գիտենք ինչ երկրում ենք ապրում, ինչ է կատարվում այս երկրում,- մեզ հետ զրույցում բացատրելով վերոնշյալ փաստն, ասաց Վ. Սեդրակյանը:- Անիմաստ է հետևելը. ի՞նչ է` առաջին ընտրություննե՞րն են, թե չգիտենք, որ կուսակցությունն է ընտրություններ անցկացնում:

Բնականաբար, հարց է առաջանում, եթե անիմաստ է, ապա ինչո՞վ է պայմանավորված Վ. Սեդրակյանի թեկնածության առաջադրումը, երբ սկզբից ևեթ իմացել է վերոնշյալի մասին:

- Չէ, հետևելն է անիմաստ, պայքարել միշտ պետք է, բայց այդ հետևելով չէ պայքարը,- մեր հիշյալ տարակույսին արձագանքելով, ասաց ՀՀ նախագահի թեկնածուն:- Պետք է ազգի մեջ նոր գաղափարներ ներարկել, որ ազգը ոտքի կանգնի: Իմ առաջադրման իմաստը դա էր: Եթե ուշադիր եղել եք, իմ գաղափարախոսությունը քաղաքական որևէ ուղղվածություն չուներ, ավելի ճիշտ, քաղաքական գաղափարախոսություն չէր:

Ինչպես հայտնի է, Վ. Սեդրակյանը մրսածության և լյարդի հետ կապված առողջական խնդրի պատճառով դիմել էր Միքայելյանի անվան վիրաբուժության ինստիտուտ: Այս կապակցությամբ նա հավաստեց, որ առողջական վիճակը նորմալ է, կարողացել է գնալ ընտրատեղամաս, արդեն քվեարկել, եկել է, սակայն նշելով, որ դեռ բժիշկների հսկողության ներքո է, գնում-գալիս է բուժհաստատություն, հույս հայտնեց, որ փետրվարի 21-ին արդեն կկարողանա մամուլի ասուլիսով հանդես գալ և իր գնահատականը տալ:

Անդրադառնալով մեր հաջորդ հարցին, թե ինչ կանխատեսում, ենթադրություն ունի իր օգտին ստացվելիք քվեների տոկոսային հարաբերակցության մասին, ՀՀ նախագահի թեկնածուն ասաց.

- 81 տոկոս, թե ինչ կնկարի իշխող կուսակցությունը, դա ուրիշ բան է: Միայն մի բան ասեմ, որ փետրվարի 19-ից սկսվում են նախագահական ընտրություններ:

Լուսանկարն՝ ըստ Ֆոտոլուրի