Փաստ ինֆո

Ժամը 16:55-ի դրությամբ «iditord.org» կայքում գրանցվել է ընտրախախտումների 236 հաղորդագրություն: Դրանցից 66-ը վերաբերում է ընտրակաշառքների և ճնշումների դեպքերին, 57-ը` նախընտրական քարոզչությանը, 51-ը` քվեարկության ընթացակարգի խախտումներին, 19-ը` քվեարկության օրվա կեղծիքներին, 19-ը` քվեարկության օրը հասարակական կարգի խախտմանը, 20-ը` ընտրացուցակներին:

Նույն կայքի տեղեկացմամբ՝ Արարատի մարզի Արտաշատ քաղաքի թիվ 17/3 ընտրատեղամասից «Իրավունքի Եվրոպա միավորում» դիտորդական խմբի անդամներն ահազանգում են, որ հանձնաժողովի անդամներն ու Սերժ Սարգսյանի վստահված անձինք ճնշում են գործադրում դիտորդների վրա: Այս մասին տեղեկացնում է «Մեդիա կենտրոնը»:

«Առավոտից արդեն գրանցվել է Սերժ Սարգսյանի չորս վստահված անձ, որոնք անընդհատ գնում-գալիս են, բավական ագրեսիվ են մեր՝ երկու դիտորդներիս նկատմամբ, վիրավորական արտահայտություններ են անում, խոչընդոտում են մեր աշխատանքն ու տեղաշարժը»,- «Մեդիա կենտրոնին» հայտնել է 17/3 ընտրատեղամասում դիտորդություն իրականացնող Լենա Նազարյանը:

Վերջինս հավելել է նաև, որ «անընդհատ լարված վիճակում են, քանի որ հանձնաժողովում պատճառ են փնտրում, որ արձանագրություն կազմեն և ընտրատեղամասից հանեն դուրս»:

Ժամը 12։15-ին 080 080 804 թեժ գծին ստացվել է ահազանգ «Իրավունքի Եվրոպա Միավորում» ՀԿ-ի դիտորդ Տիգրան Եգորյանից, որ Արտաշատի 17/2, 17/3 տեղամասերում հանձնաժողովի նախագահը մեկուսացրել է դիտորդներին, իսկ 17/7-ում հայտնաբերվել են կրկնակի քվեարկության դեպքեր:  

«Իրավական շտապ օգնության» մեքենայի իրավաբանն ու դիտորդը Երևանի թիվ 8/05, 8/06 եւ 8/07 ընտրատեղամասերում շրջայցի ժամանակ արձանագրել են, որ քաղաքացին քվեարկում է ընտրական տեղամասից դուրս՝ ավտոմեքենայի մեջ:

Կայքի ստացած մեկ այլ ահազանգի համաձայն` 12/02 և 12/03 ընտրատեղամասերում քվեաթերթիկի հետևում թվեր են գրվում և ստորագրում: