Փաստ ինֆո

Այսօր` կեսգիշերին կավարտվի ՀՀ նախագահի փետրվարի 18-ի ընտրություններին գրանցված թեկնածուների նախընտրական քարոզարշավը:

Փետրվարի 17-ը «լռության օր» է:

«Ընդհանուր առմամբ, իհարկե, այս անգամ քարոզարշավը որոշակի առանձնահատկություններ ունեցավ, սակայն պետք է նկատել շատ կարևորագույն մի հանգամանք` քարոզարշավի ընթացքում բոլոր թեկնածուների համար լիարժեք ապահովվեցին ազատ հնարավորություններ` ներկայացնելու իրենց տեսակետները, իրենց մոտեցումները։ Կարծում եմ, թեկնածուները բոլորն ունեցան հնարավորություններ` հանրության հետ շփվելու, օգտվելու զանգվածային լրատվամիջոցների ծառայություններից։ Պետք է նկատել, որ անգամ իրականացված մոնիտորինգները հենց փաստում են այն հանգամանքը, որ թեկնածուները կարողացել են իրենց ասելիքը ազատորեն տեղ հասցնել»,-ասել է «Ազատություն» ռադիոկայանի «Տեսակետների խաչմերուկ» այսօրվա ծրագրի հյուրը` Կենտրոնական ընտրական հանձնաժողովի նախագահ Տիգրան Մուկուչյանը:

ՀՀ գործող նախագահ, Նախագահի թեկնածու Սերժ Սարգսյանն այսօր մայրաքաղաքի «Մոսկվա» կինոթատրոնում հանդիպել է Կենտրոն վարչական շրջանի ընտրողների հետ և պատասխանել նրանց հարցերին: Նա նաև անդրադարձել է իր մրցակիցների քարոզարշավին, մասնավորապես, ընդծելով Րաֆֆի Հովհաննիսյանի «գեղեցիկ քարոզարշավը՝ լի հազարավոր, տասնյակ հազարավոր ձեռքսեղմումներով»: «Դրա միջոցով Րաֆֆին փորձում է հասնել մեր երկրի յուրաքանչյուր քաղաքացու: Ոմանք փորձում են դրան սարկազմով վերաբերվել, բայց, ճիշտն ասած, իրականությունն այն է, որ Րաֆֆին մշակույթ է փոխում մեր երկրում, նոր քաղաքական ավանդույթ է արմատավորում: Նա ապացուցում է, որ ընդդիմադիր լինել` չի նշանակում շուրջբոլորն ատելություն տարածել»: Հրանտ Բագրատյանի վերաբերյալ էլ Սերժ Սարգսյանը նշել է, որ թեպետ համաձայն չէ այս թեկնածուի հետ, սակայն հետաքրքությամբ հետևում է նրա հարցազրույցներին. «Բազմաթիվ անգամ ասել եմ, որ եթե համաձայն չենք այս կամ այն կարծիքի հետ, մենք իրավունք չունենք այն լռեցնել, մենք պետք է հրապարակայնորեն վիճենք այդ կարծիքի հետ և, եթե կարող ենք, իհարկե, նաև հերքել»: «Ես շատ ուրախ եմ, որ Հայաստանի Հանրապետության նախագահի այս ընտրությունների քարոզարշավի ընթացքում հաղթում է մեր Սահմանադրությունը, նրա տառը և ոգին: Եվ ես սրա մասին կարող եմ միայն հպարտությամբ խոսել», - ընդգծել է Սերժ Սարգսյանը:

Նախագահի թեկնածու Րաֆֆի Հովհաննիսյանը նախընտրական քարոզարշավն եզրափակել է «Մարիոթ» հյուրանոցում` հանդիպելով իր համակիրների և ընտրողների հետ: «Այս 25 օրվա ընթացքում հիանալի քարոզարշավ ենք ունեցել: Իհարկե, եղել են խախտումներ, եղել են կաշառքի խոստումներ»,-մասնավորապես ասել է նա` հավաստիացնելով, որ ով «հիմիկվանից մինչև փետրվարի 18-ը ձեռքը բարձրացրեց, փող տվեց, վախեցրեց Հայաստանի քաղաքացուն, ինքը պատասխան պիտի տա ոչ թե իմ առջև, այլ պատասխան է տալու օրենքի, Սահմանադրության և Հայաստանի ժողովրդի կամքի և ապագայի առջև»: Թեկնածուն փետրվարի 19-ին` ժամը 17:00-ին, հրավիրել է բոլորին Ազատության հրապարակ, որտեղ մտադիր է հանդես գալ մամուլի ասուլիսով:

Հրանտ Բագրատյանն իր քարոզարշավի ամփոփիչ հանդիպումներն անցկացրել է Տավուշի մարզի տարբեր համայնքների բնակիչների հետ` ներկայացնելով իր նախընտրական ծրագրի դրույթները և պատասխանելով ընտրողների հարցերին:

Պարույր Հայրիկյանի ամփոփիչ հանդիպումը ընտրողների հետ կայացել է Ազատության հրապարակում: Նա նշել է, որ այսօր իրեն բավականին լավ է զգում: Թեկնածուն հայտնել է, որ իր աջակիցները տարածել են ընտրողներին ուղղված ուղերձ, որում, մասնավորապես, կոչ է արվում «գնալ ու քվեարկել Հայրիկյանի և միայն Հայրիկյանի օգտին», իսկ «չմասնակցել, չքվեարկել, ձայն տալ այլ թեկնածուի` դավաճանություն է ազգային արժեքային համակարգի նկատմամբ և աջակցություն մեզ ազգովի ահաբեկել կամեցող տեռորիստներին»։

Արման Մելիքյանը հանդիպել է լրագրողների հետ: Նա, մասնավորապես, ընդգծել է, որ երկրից այսօր բացակայում է շուրջ 1 միլիոն 260 հազար ընտրող կամ ընտրողների ընդհանուր թվի շուրջ կեսը: Թեկնածուն համոզնունք է հայտնել, որ իշխանությունները կեղծելու են ընտրությունները` ՀՀ գործող նախագահ, նախագահի թեկնածու Սերժ Սարգսյանին վերագրելով երկրից բացակայող ընտրողների ձայները: