Փաստ ինֆո

ՀՀ Նախագահի թեկնածու Անդրիաս Ղուկասյանի կողմից տարածված հայտարարության մեջ նշվում է, որ իշխող կուսակցությունը փորձում է մոտ 5 մլրդ դրամով գնել Հայաստանի քաղաքական ապագան:

Ինչպես և բոլոր անցած ընտրություններում, իշխող կուսակցությունը նորից բաժանում է ընտրակաշառք և կիրառում է հարկադրանք քաղաքացիների նկատմամբ` իր օգտին քվեարկելու համար: «Մեզ հասած տեղեկությունների համաձայն՝ Սերժ Սարգսյանի օգտին քվեարկելու համար առաջարկում են 5000-7000 դրամ գումար»,- նշում է Նախագահի թեկնածուն և ավելացնում, որ դրա դիմաց ՀՀԿ-ն ակնկալում է 5 տարվա մեջ ևս 5 մլրդ դոլարով ավելացնել իշխող վերնախավի ապօրինի հարստությունը:

Հայտարարության մեջ մասնավորապես նշվում է, որ միջազգային դիտորդներն իրենց ուսերին կվերցնեն շատ մեծ բարոյական և քաղաքական պատասխանատվություն, եթե պնդեն, ինչպես արեցին 2008 թ., որ ընտրությունների անցկացման գործընթացը համապատասխանում է միջազգային ստանդարտներին: Նման գնահատականը մեծ սեպ կխրի հայ ժողովրդի և եվրոպական ընտանիքի միջև: Դա թյուր տպավորություն կստեղծի մեր հանրության մեջ, որ եվրոպական քաղաքական ուժերը ևս գալիս են իշխանության` ընտրություններում ընտրողների նկատմամբ հարկադրանքի կիրառման և ընտրակաշառքի միջոցով, ինչպես Հայաստանում:

«Մեր կարծիքով փետրվարի 18-ի քվեարկության արդյունքները չեն արտահայտի հանրության կամքը: Ուստի, այդ օրը ԿԸՀ-ի կողմից հաղթող ճանաչված թեկնածուն իրավասու չի լինի ներկայացնել Հայաստանը միջազգային և ներքին հարաբերություններում: Մենք զգուշացնում ենք բոլոր պետություններին, որ ոչ լեգիտիմ ճանապարհով ՀՀ նախագահի պաշտոնը զբաղեցրած անձի կողմից կատարված հայտարարությունները և կնքված միջազգային փաստաթղթերը հետագայում, երբ Հայաստանում կհաստատվի իրական ժողովրդավարություն, որևէ իրավական ուժ չեն ունենալու Հայաստանի համար: Մենք նաև տեղեկացնում ենք ՀՀ քաղաքացիներին, որ այդ անձի կողմից ընդունված կամ հաստատված իրավական ակտերը առ ոչինչ են իրենց ընդունման պահից»,- նշում է Անդրիաս Ղուկասյանը:

Նախագահի թեկնածուի նախընտրական շտաբը ընտրություններից հետո կամփոփի այս շրջանի գործողությունները և քաղաքացիական շարժման միջոցով քաղաքական նոր գործընթացի սկիզբ կդնի Հայաստանում: Վերջիններս համոզված են, որ Հայաստանում համընդհանուր քաղաքացիական անհնազանդության միջոցով քաղաքացիները հաղթանակ կտանեն քրեաօլիգարխիկ համակարգի դեմ և վերջնական ժողովրդավարություն կհաստատեն երկրում:

Լուսանկարն՝ ըստ Ֆոտոլուրի