Փաստ ինֆո

Չելյաբինսկի տարածաշրջանի ղեկավար Միխայիլ Յուրևիչը փետրվարի 15-ը համարում է Չելյաբինսկ քաղաքի երկրորդ ծննդյան օրը: Այդ մասին նա ասել է այսօր կայացած մամլո ասուլիսում՝ նվիրված հարավային Ուրալի տարածքում բնակարանային և սոցիալական ֆոնդի վերականգնման ուղղությամբ իրականացվելիք աշխատանքներին:

«Եթե պայթած երկնաքարը մի փոքր ավելի մեծ չափերի լիներ, ապա դժվար է պատկերացնել, թե ինչ կկատարվեր մեր քաղաքների ու գյուղերի հետ: Այս ֆոնի վրա խամրում է այն մեկ միլիարդը գերազանցող հսկայական գումարը, որն ըստ նախնական հաշվարկների կպահանջվի ջարդված ապակիների և շենքերի վնասված ճակատամասերի վերականգնման համար»,-ասել է Յուրևիչը:

«Չելյաբինսկի տարածաշրջանում ասուպի պայթյունն ամենաուժեղն է վերջին 100 տարվա ընթացքում»,- հայտարարել է Արևմտյան Օնտարիոյի համալսարանին առընթեր մոլորակագիտության կենտրոնի տնօրեն Պիտեր Բրաունը:

Նրա հաշվարկներով երկնային մարմինը մինչև մթնոլորտի խիտ շերտերի մեջ թափանցելն ունեցել է մոտ 15 մետր տրամագիծ և մոտ 7 հազար տոննա զանգված: Նրա շարժման արագությունը եղել է ժամում 64,8 հազար կմ:

Գիտնականի նախնական հաշվարկներով՝ պայթյունի հզորությունը հավասար է եղել 300 կիլոտոննա տրոթիլային համարժեքին: Սակայն նա նշել է, որ այս գնահատականը կարող է նաև սրբագրվել և հզորության չափն իջեցվել, սակայն ոչ ավելի, քան 100 կիլոտոննա տրոթիլային համարժեքը:

Նա այս պայթյունը համեմատել է 1908թ.-ին երկիր մոլորակի վրա ընկած Տունգուսյան երկնաքարի հետ, որի պայթյունի հզորությունը գնահատվել է 40-50 մեգատոննա:

Դրանից հետո արձանագրված համանման դեպքերից մեկը տեղի է ունեցել 1947թ.-ին՝ Ուսուրական տայգայում, 10 կիլոտոննա հզորությամբ, իսկ մյուսը՝ 2009թ.-ին՝ Ինդոնեզիայի մոտ, 50 կիլոտոննա հզորությամբ:

Ըստ գիտնականի՝ Չելյաբինսկում վնասված մարդկանց մեծ քանակը (1200 մարդ) բացատրվում է այն հանգամանքով, որ երկնաքարի պայթյունի ալիքն ուղղված է եղել ուղիղ քաղաքի վրա: