Փաստ ինֆո

Դեռ նախորդ դարի 90-ական թվականներից սկսած, հիշում եմ Հայաստանում ավտովարորդների դժգոհությունը, որ վառելիքն այն չէ, բենզինի հետ ինչ-որ բան է խառնված, այն կեղծված է, բարձր օկտանային թիվ ունեցող բենզինի փոխարեն, իրենց ցածր օկտանային թիվ ունեցող բենզին են վաճառել, մեքենան լավ չի քաշում, դիզվառելիքը մաքուր չէ և այլն, և այլն:

Թվում էր, թե պատերազմի ավարտից և երկրում վառելիքի սղությունը հաղթահարելուց հետո, վերոնշյալ խնդիրներն աստիճանաբար կվերանան: Համենայն դեպս, անցած երկու տասնամյակը, կարծում ենք, լիովին բավարար էր, որ երկրում կարգուկանոն հաստատվեր, վերանար նաև վարորդների դժգոհությունը` իրենց մեքենաների օգտագործած վառելիքի որակի, բաղադրության կամ համապատասխան հատկանիշների հետ կապված: Բայց…

ՀՀ էկոնոմիկայի նախարարության շուկայի վերահսկողության պետական տեսչությունը 2012թ. դեռ միայն երկրորդ կիսամյակում իրականացրած պետական վերահսկողությամբ բացահայտել է ավտովառելիքի (բենզին, դիզվառելիք) հետ կապված բազմաթիվ խախտումներ: Մասնավորապես պարզվել է, որ Երևանի Սեբաստիա-230/1, Հասրատյան-9/2, Աճառյան-20, Լենինգրադյան-10/8, Արշակունյաց-34, Արցախի-23, Ադոնցի-7/1, Զ. Անդրանիկի-30/1, Բաբաջանյան-72, Գյուլբեկյան-43/1, Բագրատունյաց-44/1, Նոր Նորքի 7-րդ զանգվածի 40/1, Ուլնեցու-51/5, Վանաձորի Զորավար Անդրանիկի-1/1, Կոտայքի մարզի Նոր Հաճն քաղաքի Տորոզյան-19 հասցեներում նավթամթերքների մանրածախ առևտուր իրականացնող «Կամօյլ» ՍՊԸ-ն ավտովառելիքն իրացնում է առանց համապատասխանության սերտիֆիկատի և հայերեն լեզվով մակնշման, իրացվող ավտովառելիքը չի համապատասխանում տեխնիկական կանոնակարգի պահանջներին, բաշխիչ պոմպասյուների ցուցմունքները թույլատրելի սխալանքի տիրույթում չեն:

Վերոնշյալը նշանակում է, որ վարորդների գնած ավտովառելիքն այն ավտովառելիքը չի եղել, որ նրանց ներկայացվել է ու նրանք ցանկացել են գնել: Ավելին. գնել են, ենթադրենք, 20 լիտր, բայց իրականում ստացել են այնքան պակաս, որ այդ շեղումը գերազանցել է թույլատրելի սխալանքը: Չափազանց դժվար է պատկերացնել, որ շեղումը թույլատրելի սխալանքը գերազանցել է հակառակ ուղղությամբ, այսինքն` գնել են 20 լիտր, բայց ստացել, ասենք, 21-22 լիտր: Պարզ է նաև, թե ավտովառելիքն ինչու չի ունեցել համապատասխանության սերտիֆիկատ, տեխնիկական կանոնակարգի պահանջներին համապատասխանող բենզինը և (կամ) նավթն ինչպե՞ս կարող էին ունենալ այդ փաստաթուղթը:

Ճիշտ նույնաբնույթ խախտումներ են հայտնաբերվել նաև նավթամթերքների ներմուծմամբ և Երևանի Բագրատունյաց-67/1 (բազա), Արտաշիսյան-100 (բազա), Իսակովի-11/1, Կոմիտաս-60, Վարդանանց փողոցի հարող տարածք, Լենինգրադյան-30/1, Այվազովսկու-25, Երևան-Եղվարդ խճուղու աջակողմյան հատված հասցեներում, Քասախ գյուղում դրանց իրացմամբ զբաղվող «Սիթի Պետրոլ Գրուպ» ՍՊԸ-ի լցակայաններում:

Նավթամթերքների իրացմամբ զբաղվող ‹‹Արմեն և ընկերներ›› ՍՊԸ-ի (Երևան, Ազատության պողոտա-26/3) կողմից օգտագործվող չափման միջոցների մի մասը ստուգաչափված չի եղել, իսկ նույնաբնույթ գործունեություն ծավալող ‹‹Տիգրան Գրիգորյան և ընկերներ›› ՍՊԸ-ի կողմից իրացվող ավտովառելիքը չի համապատասխանել տեխնիկական կանոնակարգի պահանջներին:

Երկու բազա և 22 բենզալցակայան ունեցող, նավթամթերքների ներմուծմամբ և իրացմամբ զբաղվող ‹‹ՄԻԿԱ ՔՈՐՓՈՐԵՅՇՆ›› ընկերության (Երևան, Բելյակովի-5) կողմից իրացվող ավտովառելիքը նույնպես չի համապատասխանել տեխնիկական կանոնակարգի պահանջներին: Բացի նշված պահանջներին չհամապատասխանելուց, առանց հայերեն լեզվով մակնշման է իրացվել նաև նավթամթերքների ներմուծմամբ, իրացմամբ զբաղվող ‹‹Մաքս Հուր›› ՍՊԸ-ի (Երևան, Արին-Բերդի-3 /բազա/, Շիրակի մարզի Ախուրյան գյուղ /բազա/, Երևան, Թբիլիսյան խճուղի-13/2, Վերֆելի-2/3, Իսակովի-23, Աբովյան, Երևանյան խճուղի-1/21, Աշտարակ, Նարեկացի-86), ինչպես նաև 15 բենզալցակայան և մեկ բազա (Երևան, Արին-Բերդի-9) ունեցող «ՌԱՆ-ՕՅԼ» ընկերության կողմից իրացվող ավտովառելիքը:

Ինչպես ակնհայտ է, խախտումները զանգվածային բնույթ ունեն, և, կարծում ենք, դրանք շատ ավելին կլինեին, եթե հիշյալ տեսչությունը 2012 թ. առաջին կիսամյակում ևս պետական վերահսկողություն իրականացրած լիներ նշված ոլորտում: Հավելենք, որ օրինախախտ ընկերությունների նկատմամբ նշանակվել է վարչական տուգանք 100 000-ից մինչև 1 700 000 դրամի չափով:

Հեղինակ` Արթուր Հովհաննիսյան