Փաստ ինֆո

Երևանի Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանությունը կազմակերպելու գործը քննող Մալաթիա-Սեբաստիա վարչական շրջանի ընդհանուր իրավասության դատարանը՝ դատավոր Տիգրան Պետրոսյանի նախագահությամբ, նորից կդիմի Հատուկ քննչական ծառայությանը, որպեսզի վերջինս ստուգի նախաքննության ընթացքում խոշտանգումների վերաբերյալ այսօրվա հայտարարության իսկությունը: Որոշումը դատարանը կայացրեց գործով դատավարական հսկողություն իրականացնող դատախազ Արմեն Մարուխյանի միջնորդության հիման վրա:

Այսօր մայր գործով սպանության օժանդակության համար դատապարտված Արթուր Հովհաննիսյանը հայտարարեց, որ նախաքննության ընթացքում եղել են խոշտանգումներ ու հոգեբանական ճնշումներ: Մասնավորապես, հարևան սենյակից լսվում էր իր փաստացի կնոջ՝ Լուսինե Ղևոնդյանի գոռոցները՝ «ով ուզում է լիներ, կկոտրվեր»: Ըստ նրա, առանց պաշտպանի է հարցաքննվել, իսկ ներկայացած անձն էլ իրականում ԱԱԾ աշխատակից է եղել: Նա հայտարարեց նաև, որ իր մորն էլ են խփել ու ատամները ջարդել: «Բա ինձ ինչ կանեին»,- ասաց դատապարտյալը:

Ավելի վաղ խոշտանգումների մասին հայտարարել էին նաև գործով վկաներ Ահարոն Հակոբյանն ու Արամայիս Սեդրակյանը և այդ ցուցմունքների առնչությամբ նույնպես դատարանը դիմել էր ՀՔԾ-ին:

Դատապարտյալը պնդեց մայր գործով իր դատաքննական ցուցմունքները, հրաժարվեց ցուցմունք տալ ու պատասխանել մեղադրող կողմի հարցերին: Ի պատասխան պաշտպանական կողմի հարցերի՝ նա հայտարարեց, որ իր նախաքննական ցուցմունքները չեն համապատասխանում իրականությանը: Դատապարտյալը հայտարարեց նաև, որ այսօր առաջին անգամ է տեսնում Ստեփան Հակոբյանին (նա մեղադրվում է սպանությունը կազմակերպելու մեջ), ոչինչ նրա մասին չգիտե, ամեն ինչ շինծու է: «Ես դատվեցի շինծու մեղադրանքով և ամեն ինչ կորցրեցի»:

Ըստ դատարանում հրապարակված որպես մեղադրյալ նրա նախաքննական ցուցմունքների, իր մեքենայով Արսեն Առուշանյանին (նա ցմահ ազատազրկման է դատապարտվել սպանությունը կատարելու համար) մերթ ընդ մերթ տարել է Մալաթիայի տարածք, որտեղ մարդ էր փնտրում՝ հետագայում պարզվել է, որ այդ մարդը Սեդրակ Զատիկյանն է՝ «հարմար պահի էր սպասում Սեթոյին սպանելու համար, բայց ամեն անգամ չէր ստացվում»: Ըստ մեղադրյալի, խոսակցություններից հասկացել է, որ կան այլ մարդիկ, ովքեր շահագրգիռ են Ս.Զատիկյանի սպանությամբ, սպանությունից հետո Արսենը «զանգեց ինչ-որ մեկին, ասաց՝ ախպերներ ջան, շատ լավ է՝ տղա է»: Ա.Հովհաննիսյանը նախաքննության ընթացքում ասել էր, որ ինչ-որ մեկը Արսենին փաթեթ փոխանցեց, ավելի ուշ Ա.Առուշանյանը գրպանից 10 հազար դոլար հանեց և 2 հազար դոլար տվեց իրեն՝ Արթուր Հովհաննիսյանին: Ըստ այն ժամանակ մեղադրյալի, Արսենը մեծ ծախսեր էր անում՝ ընդհանուր առմամբ, «30 հազար դոլար է ծախսել մեր վրա»: Արսենն էլի էր գումար ակնկալում, խոսում էր ինչ-որ մարդկանց հետ, նրանք փող չէին տալիս, «պահանջում էին սպանել նաև Սեթոյի եղբորը, նոր փող կտան»:

Իսկ մայր գործով տված դատաքննական ցուցմունքներում Ա.Հովհաննիսյանը հրաժարվել էր նախաքննական ցուցմունքներից, հայտարարել, որ ինքն ու Լուսինեն Մալաթիա են գնացել կահույք ու կոշիկ նայելու, Արսենն էլ իրեն գումար չի տվել և գումարներ չի ծախսել:

Ամբաստանյալ Ս.Հակոբյանի պաշտպան Երեմ Սարգսյանը հայտարարեց, որ դատապարտյալի նախաքննական ցուցմունքները վերցվել են օրենքի խախտմամբ՝ ամբաստանյալի հարցաքննությունը սկսվել է գիշերային ժամի՝ 23.30-ին, թեև չի դասվում անհետաձգելի քննչական գործողության շարքին, տևել է օրենքով սահմանված ժամանակից ավելի, ուստի չի կարող դրվել մեղադրանքի հիմքում:

Փետրվարի 20-ի դատական նիստում դատարանը կանցնի գործի գրավոր ապացույցների հետազոտմանը: