Փաստ ինֆո

Փետրվարի 13-ին Մալաթիա-Սեբաստիա վարչական շրջանի դատախազությունից ոստիկանության Մալաթիայի բաժնում ստացվել է ՀՀ Նախագահի թեկնածու Րաֆֆի Հովհաննիսյանի կայքէջում զետեղված ընտրախախտումների վերաբերյալ ծանուցումն այն մասին, որ Սուսաննա Բարխուդարյանն այցելել է Անդրանիկի 74 հասցեում գտնվող «Վետերան» օթևան, որի աշխատակիցները թույլ չեն տվել, որ «Ժառանգություն» կուսակցության քարոզչական նյութերը բաժանվեն ծերերին՝ պնդելով, որ իրենք կփոխանցեն:

Հետաքննության ընթացքում ոստիկանության ծառայողները բացատրություններ են վերցրել օթևանի ղեկավարներից, որոնք նշել են, որ փետրվարի սկզբներին իրենց մոտ է այցելել մի կին, ներկայացել Ր. Հովհաննիսյանի վստահված անձ, և քարոզչություն իրականացնելու նպատակով՝ ցանկացել է մուտք գործել օթևանի հատված, բայց քանի որ «Վետերան» օթևանի կանոնակարգի 3-րդ կետի 3.3 ենթակետի համաձայն անծանոթ անձանց մուտքը օթևանի տարածք արգելվում է, ուստի վերջինիս մուտք գործել օթևանի բնակելի հատված՝ արգելվել է, և միևնույն ժամանակ՝ առաջարկվել նախընտրական բուկլետները թողնել օթևանի խաղասենյակում, որտեղ էլ օթևանի բնակիչները կարող են ծանոթանալ այդ նյութերին, որը և կատարվել է:

Բացատրություն վերցնելու նպատակով Սուսաննա Բարխուդարյանին մի քանի անգամ զանգահարել են, սակայն նա չի պատասխանել հեռախոսազանգերին:

Ոստիկանությունից տեղեկացնում են, որ հետաքննությունը շարունակվում է:

Ի դեպ Սուսաննա Բարխուդարյանից ոստիկանությունը ահազանգ էր ստացել նաև 2013թ. հունվարի 24-ին` այն մասին, որ Երևան քաղաքի Րաֆֆու փողոցի 33 շենքի մոտ իրեն խոչընդոտում են և չեն թողնում բաժանել «Ժառանգություն» կուսակցության նախընտրական բուկլետները:

ՀՀ ոստիկանության Մալաթիայի բաժնում նախապատրաստվող նյութերի ընթացքում ՀՀ ոստիկանության Մալաթիայի բաժին է հրավիրվել ՀՀ ոստիկանություն ահազանգած Սուսաննա Բարխուդարյանը, սակայն վերջինս, պատճառաբանելով իր զբաղվածությունը, հրաժարվել է ներկայանալ:

Կատարված հետաքննությամբ պարզվել է, որ Սուսաննա Բարխուդարյանը, հանդիսանալով ՀՀ Նախագահի թեկնածու Րաֆֆի Հովհաննիսյանի նախընտրական քարոզարշավի Մալաթիա-Սեբաստիա համայնքի համակարգող, սույն թվականի հունվարի 24-ին` ժամը 17:30-ի սահմաններում, քարոզարշավի շրջանակներում գտնվել է Մալաթիա-Սեբաստիա համայնքի Րաֆֆու 33 շենքի մոտակայքում և քաղաքացիներին, պատահական անցորդներին, բաժանել Րաֆֆի Հովհաննիսյանի նախընտրական ծրագրի վերաբերյալ բուկլետներ, որի ժամանակ Սուսաննա Բարխուդարյանը, մոտենալով վերոնշյալ հասցեի տարբեր հատվածներում կանգնած մի քանի երիտասարդների, նրանց առաջարկել է բուկլետներ, սակայն վերջիններս չեն ցանկացել դրանք վերցնել, պատճառաբանելով, որ իրենք չեն ցանկանում ընտրել նշված թեկնածուին, որից հետո Սուսաննա Բարխուդարյանը հեռացել է` շարունակելով իր քարոզարշավը:

Նկատի ունենալով, որ «Ժառանգություն» կուսակցության լիազորված անձի լիազորությունների իրականացմանը խոչընդոտելու հանգամանքը բացակայում է, 2013թ. փետրվարի 7-ին քրեական գործ հարուցելը մերժվել է` հանցագործության դեպքի բացակայության հիմքով:

ՀՀ Նախագահի թեկնածու, «Ժառանգություն» կուսակցության նախագահ Ր. Հովհաննիսյանին գրավոր տեղեկացվել է, որ ահազանգի հիման վրա նախապատրաստված նյութերի շրջանակներում Ս. Բարխուդարյանը հրաժարվել է բացատրություն տալ եւ չի ներկայացել ոստիկանության բաժին, իսկ հեռախոսազրույցի ժամանակ հայտնել, որ հիմք ընդունվեն 25.01.2013թ. իր կողմից հաղորդում տալուց հրաժարվելու մասին արձանագրությունը, ինչպես նաև` բացատրություն տալուց հրաժարվելու արձանագրության մեջ դեպքի առնչությամբ հակիրճ մեջբերումը:

Միաժամանակ, Ր. Հովհաննիսյանին հայտնվել է, որ քրեական գործի հարուցումը մերժելու մասին որոշման հետ համաձայն չլինելու դեպքում, ՀՀ քրեական դատավարության օրենսգրքի 185-րդ հոդվածի 3-րդ մասով սահմանված կարգով, կարող են այն բողոքարկել: