Փաստ ինֆո

Թերթը գրում է, որ Վանաձորի պետական մանկավարժական ինստիտուտի ուսանողուհի Մարինե Վարդումյանը, ում դեմ սուտ մատնության համար քրեական գործ էր հարուցվել, ենթարկվել է քրեական պատասխանատվության:

Լոռու մարզի ընդհանուր իրավասության առաջին ատյանի դատարանը փետրվարի 8-ի դատավճռով ուսանողուհուն մեղավոր է ճանաչել` ՀՀ քրեական օրենսգրքի 333-րդ հոդվածի 2-րդ մասի 1-ին կետով` սուտ մատնություն, և դատապարտել ազատազրկման մեկ տարի ժամկետով:

Թերթը նշում է, որ նախորդ տարվա օգոստոսի 11-ին Մ. Վարդումյանը Լոռու մարզի դատախազին հաղորդում էր տվել այն մասին, որ Վանաձորի պետական մանկավարժական ինստիտուտի դասախոս Արամ Համբարյանն իր կամքին հակառակ սեռական հարաբերություններ է ունեցել իր հետ` վախեցնելով և բռնություն կիրառելով իր նկատմամբ:

Ստացված հաղորդման հիման վրա հարուցվել էր քրեական գործ` ՀՀ քրեական օրենսգրքի 138-րդ հոդվածի 1-ին մասով:

Սակայն դասախոսը հերքել էր իրեն ուղղված մեղադրանքները` նշելով, որ ինքը Մ. Վարդումյանի հետ գտնվել է ամուսանական կապի մեջ, այնուհետև բացահայտել նրա վիրտուալ սիրային կապն այլ տղամարդկանց հետ ու հեռացել տանից:

Հարուցված քրեական գործով Մ. Վարդումյանի մեղադրանքները չէին ապացուցվել և դասախոսի նկատմամբ քրեական հետապնդումը դադարեցվել էր:

Այնուհետև անցած տարվա հոկտեմբերի 17-ին որոշում էր կայացվել Մ. Վարդումյանին մեղադրանք առաջադրել` ՀՀ քրեական օրենսգրքի 333-րդ հոդվածի 2-րդ մասի 1-ին կետով: Մ. Վարդումյանը վրեժխնդիր լինելու շարժառիթով, գիտակցելով, որ իր կողմից տրամադրված տեղեկությունները կեղծ են, կատարել էր սուտ մատնություն:

Դասախոս Արամ Համբարյանի` բռնաբարության մեջ կասկածվելու մեղադրանքն ամբողջովին հերքվել էր: