Փաստ ինֆո

Վերջին մի քանի օրերին, բացարձակապես չի աշխատում ՊԵԿ էլեկտրոնային հաշվետվությունների ներկայացման համակարգը: Մենք բազմաթիվ ահազանգեր ենք ստացել հարկատուներից, որոնք հայտնում են դրանից օգտվելու անհնարինության մասին:

Ներկայումս աշխատանքային ժամերին անհնար է ներկայացնել եկամտային հարկի և անձնավորված հաշվառմանը վերաբերվող հաշվարկ հաշվետվությունները համակարգի անսարքության պատճառով:

Մեր կողմից ստուգվել են այդ ահազանգերից մի մասը` պարզվում է, որ դրանք համապատասխանում են իրականությանը` համակարգը փաստացի չի աշխատում:

Առկա են մասնավորապես հետևյալ խնդիրները`

• հնարավոր չէ մուտք գործել համակարգ,

• մուտք գործելու դեպքում անհնար է կատարել հաջորդ քայլերը, որոնք անհրաժեշտ են հաշվետվությունները ներկայացնելու համար,

• առկա են նաև այլ թերություններ կապված համակարգում առկա` կազմակերպությունների տվյալների սխալների հետ: Մասնավորապես հարկային կոդի մուտքագրման դեպքում փաստաթղթերում արտացոլվում են սխալ անվանումներ, հասցեներ և այլն:

• հարկատուների կողմից ՊԵԿ և էլեկտրոնային ստորագրությունների համակարգը սպասարկող ԷԿԵՆԳ ընկերությանն ուղղված զանգերը կամ չեն պատասխանվում, կամ օպերատորի կողմից պատասխանում են, որ համակարգում աշխատանքներ են գնում և դրանով է պայմանավորված համակարգի խափանումը:

Այս ամբողջը լուրջ մտահոգություններ է առաջացնում հարկատուների շրջանում, որոնք պարզապես կարող են ենթարկվել վարչական տուգանքի` հաշվետվությունների ժամանակին չհանձնման պատճառով, որում իրենք բացարձակ մեղավորություն չունեն:

Հաշվի առնելով, որ ՊԵԿ կամ պատկան որևէ այլ մարմնի կողմից մինչ օրս չի հնչել որևէ պաշտոնական դիրքորոշում առաջացած խնդիրների և դրանց լուծման վերաբերյալ, ակնհայտ անհարմարություններ և ռիսկեր են ստեղծվել բազմաթիվ հարկատուների համար, որոնք կարող են նախ տուգանվել և երկրորդ` իրենց հիմնական գործառույթներով զբաղվելու փոխարեն ստիպված են հերթապահել համակարգիչների մոտ նույնիսկ ոչ աշխատանքային ժամերին, կորում է էլեկտրոնային կառավարման համակարգի նկատմամբ վստահությունը և համակարգի այսպիսի աշխատանքի դեպքում հարցեր են առաջանում նաև համակարգի, դրանում արտացոլվող տվյալների անվտանգության, ապահովության և ստույգության վերաբերյալ:

Կոչ ենք անում ՀՀ Կառավարությանը, ՀՀ Կառավարության համապատասխան գերատեսչություններին և ՊԵԿ ին.

• հանդես գալ պաշտոնական հայտարարությամբ, որում կնշվեն համակարգի խափանումների փաստը և դրանց համար պատասխանատու սուբյեկտները,

• մինչ նշված խնդիրների լուծումը պաշտոնապես հայտարարել հաշվետվությունների ներկայացման ժամկետների երկարացման մասին, կամ դրանք թղթային եղանակով ընդունելու պատրաստակամության մասին,

• խնդիրների տևական լինելու դեպքում, ինչպես նաև էլեկտրոնային կառավարման նոր համակարգերի ներդրման դեպքում այսուհետև շահագործել դրանք բացառապես երկարատև փորձարկումներց հետո, իսկ մինչ այդ պետական մարմինների հետ հարաբերվելու այլընտրանքային (օրինակ թղթային) եղանակներ ստեղծել հարկատուների համար,

• պարտադրել համակարգը ներդնող, շահագործող և սպասարկող ընկերության անձնակազմին պատասխանել հարկատուների զանգերին (ներկայումս անհնար է նրանց հետ կապնվելը), իսկ էլ. հաշվետվությունների համակարգին միանալու վերաբերյալ պայմանագրերի կնքման, նույնականացման քարտերի գրանցման և նմանատիպ այլ գործառույթների իրականացման ժամկետը կրճատել (ներկայումս դա տևում է մեկ շաբաթից ավելի, երբեմն նույնիսկ շաբաթներ):

Կոչ ենք անում վերը գրված խնդիրներին առնչվող հարկատուներին.

• հաշվետվությունների հանձնման գործընթացում տեղի ունեցող խափանումները փաստաթղթավորել համապատասխան սարքավորումների միջոցով (համակարգչային կամ տեսա ձայնագրում) կամ խափանման պահը արձանագրել` կատարելով նշված գործողությունները այլ անձանց ներկայությամբ (վկայությամբ),

• հերթական անգամ փորձել ներկայացնել հաշվետվությունները էլեկտրոնային եղանակով, որի չստացվելու դեպքում դրանք համապատասխան գրությամբ սահմանված ժամկետների պահպանմամբ ներկայացնել իրենց սպասարկող հարկային տեսչություններ թղթային եղանակով,

• խափանումների վերաբերյալ վերը նշված արձանագրությունները, պատահած նոր խոչընդոտների վերաբերյալ տեղեկատվությունը, ինչպես նաև կարծիքները ուղարկել մեր կազմակերպության էլեկտրոնային փոստի հետևյալ հասցեով` [email protected]:

Պատրաստակամություն ենք հայտնում մեզ հասանելի միջոցներով պաշտպանելու այն հարկատուների շահերը, որոնց նկատմամբ կկիրառվեն անհիմն տուգանքներ (նշված խնդիրների արդյունքում) հաշվետվությունների` ժամանակին չներկայացման հիմքով:

«Քաղաքացի-հարկատու-բիզնես իրավապաշտպան կազմակերպություն» ՀԿ

«Փաստինֆո» լրատվական գործակալությունը ստանալով հիշյալ ՀԿ-ի վերը բերված բաց նամակը և կազմակերպության նախագահ Ա. Արտաշեսյանի խնդրանքը` հարկատուների համար առաջացած այս լուրջ խնդրի լուծմանը նպաստելու նպատակով տվյալ հայտարարությունը հրապարակելու վերաբերյալ, որոշեց հրապարակել այն` միաժամանակ տեղեկանալով ՀՀ ՊԵԿ-ի պարզաբանմանը: Սակայն վերջինիս լրատվական ծառայությունից մեզ հայտնեցին, որ դրա վերաբերյալ իրենց պատասխանը կարող են տրամադրել միայն ավելի ուշ: Պատրաստակամ ենք հրապարակել նաև ՊԵԿ-ի պատասխանը: