Փաստ ինֆո

Թերթն անդրադարձել է հունվարի 13-ի գիշերը Բագրատունյաց 20 հասցեում գործող տարադրամի փոխանակման կետի վրա հարձակման և 40մլն. դրամի հափշտակման դեպքին` հիշեցնելով, որ հարձակված դիմակավորված անձինք կրակել էին 36-ամյա Հակոբ Մկրտչյանի վրա: Վերջինս երեք վիրահատություն տանելուց հետո հունվարի 21-ին «Էրեբունի» բժշկական կենտրոնում մահացել էր:

Դեպքից մոտ մեկ ամիս անց թերթի թղթակիցը կրկին այցելել է դեպքի վայր և զրուցել ականատեսների և փոխանակման կետի տնօրեն Սերգեյ Մխիթարյանի հետ, ով հայտնել է, որ փոխանակման կետը փակ է, և հստակ չի կարող ասել, թե երբ կբացվի:

Թերթը գրում է, որ մահացած Հակոբ Մկրտչյանի եղբայրը` Ռոբերտ Մկրտչյանը, «Հայբիզնեսբանկի» տնօրենն է, իսկ տարադրամի փոխանակման կետը, որտեղ նա աշխատում էր, պատկանում է նրա միջնեկ եղբորը` Անդրանիկ Մկրտչյանին:

Ըստ հոդվածագրի` տարադրամի փոխանակման կետն ունի նաև տեսախցիկներ, սակայն երբ հարևանությամբ գործող քիմմաքրման աշխատակցից թերթի թղթակիցը հարցրել է, թե դեպքի օրն արդյոք տեսախցիկները չեն նկարել կատարվածը, նա պատասխանել է. «Ցավոք, Հակոբն անջատել է տեսախցիկները, երբ հանցագործները ներս են մտել: Երևում է` նրանք լավ էլ տեղյակ են եղել` ինչն ինչոց է»:

Դեպքի կապակցությամբ ոստիկանության Շենգավիթի քննչական բաժնում հարուցվել էր քրեական գործ` ՀՀ քրեական օրենսգրքի 175-րդ հոդվածի 2-րդ մասի 1-ին կետով, նույն մասի 4-րդ կետով, նույն հոդվածի 3-րդ մասի 1-ին կետով:

Թերթի թղթակիցը ոստիկանության հասարակայնության և լրատվության վարչությունից տեղեկացել է, որ նախաքննությունը շարունակվում է: