Փաստ ինֆո

«Աբովյան-բար» հյուրանոցային համալիրն ավելի քան 2 տարի տրամադրվել է տասնյակից ավելի մարմնավաճառների` հնագույն արհեստով զբաղվելու համար: Վերոնշյալ արարքի կամ, ավելի ճիշտ, երկու կամ ավելի անձանց օգտագործելով պոռնկությամբ զբաղվելուն նպաստելու համար (ՀՀ քրեական օրենսգրքի 262-րդ հոդվածի 2-րդ մասի 5-րդ կետ) մեղադրվում է Աբովյան քաղաքի բնակիչ, 1938թ. ծնված Շահեն Հարությունյանը:

Նախաքննությամբ պարզվել է, որ Շ. Հարությունյանը հանդիսանալով անհատ ձեռնարկատեր, համապատասխան համաձայնագրի հիման վրա իր կողմից օգտագործվող Աբովյան քաղաքի Երիտասարդական 6ա հասցեում գտնվող «Աբովյան-բար» հյուրանոցային համալիրը 2010թ. ապրիլից -2012թ. հուլիս ժամանակահատվածում մատուցողուհի Լիլիթ Մարգարյանի օժանդակությամբ պահել, ղեկավարել և օգտագործել է երկու կամ ավելի անձանց օգտագործելով պոռնկությամբ զբաղվելուն նպաստելու համար:

Մասնավորապես, ըստ մեղադրական եզրակացության, Լիլիթ Մարգարյանի հետ պայմանավորվածության համաձայն` հյուրանոցի այցելուների հաճախելիությունն ապահովելու նպատակով, հանրային վերը նշված հաստատության առանձնասենյակները հաճախորդների հետ գումարի դիմաց սեռական հարաբերություն ունենալու համար նրա միջոցով տրամադրել է մարմնավաճառներ Հեղինե Հովասափյանին, Լիանա Շահնազարյանին, Համեստ Բաբայանին, Նարինե Բաբայանին, Հերմինե Սահակյանին, Ամալյա Հակոբյանին, Գայանե Խաչատրյանին, Հայկանուշ Նաղդալյանին և այլոց, որոնցից յուրաքանչյուր անգամ առանձնասենյակ տրամադրելու դիմաց գանձված 6000-ական դրամից 1000-ական դրամը որպես աշխատավարձ վճարել է Լիլիթ Մարգարյանին, իսկ մնացած գումարները տնօրինել անձամբ:

Հիշյալ քր. գործի շրջանակներում մեղադրանք է առաջադրվել նաև նույն քաղաքի բնակիչ, 1968թ. ծնված Լիլիթ Մարգարյանին: Քրեական գործի նյութերի համաձայն` նա 2010թ. ապրիլից մինչև 2012թ. հուլիս ժամանակահատվածում աշխատելով հիշյալ հյուրանոցում որպես մատուցողուհի, Շ. Հարությունյանի հետ պայմանավորվածության համաձայն յուրաքանչյուր անգամ հաճախորդներին առանձնասենյակ տրամադրելու դիմաց գանձվելիք 6000-ական դրամից 1000-ական դրամ վաստակելու ակնկալիքով, հաճախորդների հետ գումարի դիմաց սեռական հարաբերություն ունենալու համար պարբերաբար հյուրանոց Է կանչել վերոնշյալ և այլ մարմնավաճառների:

Լ. Մարգարյանը զուգահեռաբար ունեցել է նաև հյուրանոցի այցելուների հաճախելիությունն ապահովելու նպատակ: Մարմնավաճառներին առանձնասենյակներ տրամադրելով, դրա դիմաց հաճախորդներից գումարները ստանալով և Շահեն Հարությունյանին փոխանցելով, նա օժանդակել է վերջինիս՝ նշված հաստատությանը երկու կամ ավելի անձանց օգտագործելով պոռնկությամբ զբաղվելու համար պահելուն, ղեկավարելուն և օգտագործելուն: Վերոնշյալ արարքի համար Լիլիթ Մարգարյանին մեղադրանք է առաջադրվել ՀՀ քրեական օրենսգրքի 38-262-րդ հոդվածի 2-րդ մասի 5-րդ կետով, այսինքն`պոռնկությամբ զբաղվելուն նպաստելուն օժանդակությամբ հանցակցելու համար: