Փաստ ինֆո

«Վիկիլիքս» ինտերնետ կայքի հիմնադիր Ջուլիան Ասանժը երեկ Ավստրալիայի Վիկտորիա նահանգի ընտրական հանձնաժողովին է ներկայացրել իր դիմումն՝ այս տարվա սեպտեմբերին երկրի խորհրդարանի կայանալիք ընտրություններին մասնակցելու համար: Այդ մասին այսօր տեղեկացրել է «Վիկիլիքս»-ին օժանդակություն ցուցաբերող «Ավստրալիական քաղաքացիական միություն» կազմակերպության ներկայացուցիչ Սեմ Կաստրոն: Նա նաև հայտնել է, որ դիմումի հեղինակի հետադարձ հասցեի տեղում նշված է Ասանժի մոր՝ Մելբուրնի արվարձանում գտնվող բնակության վայրը:

Կաստրոն, միաժամանակ, ասել է, որ մոտ ժամանակներում կկայանա «Վիկիլիքս» կուսակցության առայժմ 10 հոգուց բաղկացած Ազգային խորհրդի նիստը, որտեղ կքննարկվի նորաստեղծ քաղաքական կազմակերպության գրանցման հարցը: Որպեսզի այդ գրանցումն իրականացվի անհրաժեշտ է, որ առնվազն 500 ընտրողներ անդամագրվեն նոր կուսակցությանը: Ավելի վաղ Ասանժը հայտարարել էր, որ գրանցման հարցով ոչ մի դժվարություն չի կարող լինել, քանի որ «մեծ թվով արժանավոր մարդիկ, ովքեր առաջացնում են ավստրալիական հանրության հիացմունքը, հայտնել են պատրաստակամություն օժանդակել կուսակցությանը»:

Իսկ առայժմ Ասանժն ապրում է Լոնդոնում գտնվող Էկվադորի դեսպանությունում: ԻՏԱՐ-ՏԱՍՍ-ը տեղեկացնում է, որ այնտեղ նա թաքնվում է անցյալ տարվա հունիսից: Հիշեցնենք, որ Բրիտանիայում դատավճիռ է կայացվել Ասանժին Շվեդիա արտաքսելու համար, որտեղ նրան մեղադրում են սեռական բնույթի հանցանք կատարելու մեջ: Ինքը՝ Ասանժը, բազմիցս հայտարարել է, որ իր արտահանձնումը Շվեդիային ընդամենը պատճառ է, որպեսզի այնտեղից էլ արտահանձնվի ԱՄՆ-ին, որտեղ մեղադրվում է այդ երկրի ազգային անվտանգությանը վնաս հասցնելու մեջ:

Էկվադորի իշխանություններն Ասանժին քաղաքական ապաստան են տվել, սակայն դրանից նա չի կարողանում օգտվել, քանի որ դեսպանության տարածքից դուրս գալուն պես՝ անմիջապես կձերբակալվի անգլիական ոստիկանության կողմից:

Սեմ Կաստրոն ասել է, որ «Վիկիլիքս» կուսակցության գլխավոր նախընտրական կարգախոսը պետք է լինի «կառավարության գործունեության թափանցիկությունը և հաշվետվողականությունը» և քաղաքացիների իրավունքների պաշտպանությունը: Նա նաև հստակեցրել է, որ սեպտեմբերի 14-ին կայանալիք ընտրություններում, եթե Ասանժը հաղթի, բայց չկարողանա հեռանալ Լոնդոնից, ապա Ավստրալիայի խորհրդարանում նրա տեղը կզբաղեցնի նոր կուսակցության կողմից առաջադրված մեկ ուրիշը: