Փաստ ինֆո

Վերաքննիչ քրեական դատարանում ավարտվել է Սիմա Այվազյանի գործով բերված վերաքննիչ բողոքի քննությունը: Արմավիրի մարզի ընդհանուր իրավասության առաջին ատյանի դատարանը նրան մեղավոր էր ճանաչել պոռնկությամբ զբաղվելուն նպաստելու, դրանից գույքային օգուտ ստանալու համար:

Ինչպես ներկայացնում է թերթը, իրադարձությունները ծավալվել էին Էջմիածնում գործող ոչ այն է հյուրանոցային համալիրում, ոչ այն է բաղնիքում:

Որոշ մարմնավաճառներ այդ հաստատություն են մուտք գործել իրենց հաճախորդների հետ, իսկ հաստատությունում աշխատող Սիմա Այվազյանը բարեհամբույր ընդունել է նրանց, երկու ժամը հինգ հազար դրամով սենյակ տրամադրել:

Սակայն դատարանում Ս. Այվազյանը հայտարարել է, որ ինքը վերջին երեք տարիներին չի աշխատել նշված հաստատությունում:

Արմավիրի մարզի ընդհանուր իրավասության առաջին ատյանի դատարանի` 2012թ. դեկտեմբերի 4-ի դատավճռով Ս. Այվազյանը մեղավոր էր ճանաչվել` ՀՀ քրեական օրենսգրքի 262-րդ հոդվածի 1-ին մասով և դատապարտվել ազատազրկման` 1 տարի ժամկետով:

Դատավճռի դեմ վերաքննիչ բողոք են բերել ամբաստանյալը և նրա շահերի պաշտպանը` միջնորդելով բեկանել մեղադրական դատավճիռը և Ս. Այվազյանի նկատմամբ կայացնել արդարացման դատավճիռ:

Սակայն մեղադրողն, առարկելով բերված բողոքների դեմ, հիշեցրել է, որ Ս. Այվազյանն արդեն նույն հոդվածով մեկ անգամ դատապարտվել է 2005թ., որ դատվածությունը մարված է, բայց Ս. Այվազյանն ուղղման ճանապարհին չի կանգնել:

ՀՀ վերաքննիչ քրեական դատարանը մերժել է Ս. Այվազյանի ու նրա պաշտպանի վերաքննիչ բողոքները` ուժի մեջ թողնելով ընդհանուր իրավասության առաջին ատյանի դատարանի դատավճիռը: