Փաստ ինֆո

2013 թվականի ՀՀ փաստաբանական դպրոցի փետրվարի 10-ի ընդունելության քննության հանձնաժողովն հրապարակել է քննության արդյունքները և հրապարակել միավորների անցողիկ շեմը հաղթահարած հավակնորդների անունները: Ըստ հանձնաժողովի արձանագրության, քննության նվազագույն շեմը կազմել է 120 միավոր: Այն հաղթահարել են 60 հավակնորդներ, ովքեր թեստային կարգով քննության արդյունքում հավաքել են առավել բարձր՝ 123-150 միավորներ:

Նրանք, այսպիսով, իրավունք են ստանում, ըստ ընդունելության հանձնաժողովի արձանագրության, մասնակցելու ՀՀ փաստաբանական դպրոցի 2013 թվականի ուսումնական դասընթացներին:

6-ամսյա դասընթացներին մասնակցելու համար դիմում էին ներկայացրել 138 իրավաբաններ, որոնցից 10-ի դիմումները մերժվել էին: Նախորդ քննությունների համեմատ այս անգամ ակնհայտորեն ավելացել է դասընթացներին մասնակցելու ցանկություն հայտնած անձանց թիվը: Նախորդ քննություններին մասնակցության հայտ էին ներկայացրել 119 իրավաբաններ, նրանցից 7-ի դիմումները մերժվել էին հավակնորդներին ներկայացվող պահանջներին չհամապատասխանելու պատճառով, քննություններին ի վերջո մասնակցել էին 106 հավակնորդներ, նրանցից 65-ն ընդունվել էր Փաստաբանական դպրոց:

Հիշեցնենք, որ ըստ «Փաստաբանության մասին» ՀՀ օրենքի 5-րդ հոդվածի 3-րդ մասի «դատական ներկայացուցչությունը կամ դրա կազմակերպումը որպես պարբերաբար կամ վճարովի հիմունքներով մատուցվող ծառայություն կարող է իրականացնել միայն փաստաբանը»: Իսկ ըստ նույն օրենքի 45.10 հոդվածի, Փաստաբանական դպրոցն ավարտած ունկնդիրներին Փաստաբանական դպրոցի տնօրենը տասն օրվա ընթացքում տրամադրում է հավաստագիր, որն իրավունք է տալիս ունկնդրին մասնակցելու փաստաբանների որակավորման քննությանը: