Փաստ ինֆո

«Խոսրովի անտառ» պետական արգելոց» պետական ոչ առևտրային կազմակերպության տնօրենի թափուր պաշտոնի համար ՀՀ բնապահպանության նախարարությունը հայտարարել է մրցույթ, որը նախատեսել է 2013թ. մարտի 15-ին՝ ժամը 15:00-ին, նախարարության նիստերի դահլիճում:

Հիշյալ կազմակերպության նախկին տնօրենը, ինչպես հայտնի է, պաշտոնից ազատվեց 2012թ. աշնանը Խոսրովի արգելոցում որսագողության խայտառակ դեպքի բացահայտումից հետո, որը հասարակական մեծ հնչեղություն ստացավ: 2012թ նոյեմբերի 23-ին ՀՀ բնապահպանության նախարարությունը Խոսրովի արգելոցի տնօրենի պաշտոնի համար մրցույթ հայտարարեց: Գրանցված երեք թեկնածուներից, սակայն, մրցույթին ներկայացավ միայն Խոսրովի արգելոցի արդեն նախկին փոխտնօրեն Գաբրիել Պողոսյանը: Վերջինս մրցույթի արդյունքում համարվեց հաղթող, բայց չմնաց այդ պաշտոնում: Սկիզբ առած և գնալով աճող հասարակական մեծ դժգոհության ու բողոքի արդյունքում նա հարկադրված եղավ հրաժարվել Խոսրովի արգելոցի տնօրենի պաշտոնը զբաղեցնելուց, միաժամանակ ազատվեց նաև տնօրենի տեղակալի պաշտոնից, որը մինչ այդ զբաղեցնում էր:

Նոր պաշտոնից հրաժարվելը և զբաղեցրած պաշտոնից Գաբրիել Պողոսյանի ազատվելը, կարծում ենք, արդարացի էր, որովհետև նա նույնպես, եթե ոչ իրավական առումով և անմիջականորեն, ապա բարոյական առումով հաստատապես պատասխանատու է երկարատև ժամանակաընթացքում կատարված, բնությանը, հանրությանն ու պետությանը մեծ վնաս պատճառած որսագողության համար: Ընդգծենք, որ «Թռչկան», «Խոսրովի արգելոց», «Ջերմուկը հանք չի դառնա», «Փրկենք Թեղուտը» քաղաքացիական նախաձեռնությունների համոզմամբ, Խոսրովի արգելոցում որսագողության նշված դեպքը եզակի չէ: ՀՀ վարչապետին և գլխավոր դատախազին հասցեագրած իրենց 05.11.2012թ. դիմումում նրանք նշել են.

«Բացի այդ, որոշ ինտերնետային կայք-էջերի ուսումնասիրության արդյունքում պարզել ենք, որ արգելոցում և Հայաստանի այլ վայրերում կազմակերպված հանցավոր խմբերի կողմից տարիներ շարունակ իրականացվել է Կարմիր գրքում գրանցված կենդանիների ապօրինի որս, ինչը քրեորեն հետապնդելի արարք է և առաջացնում է քրեական պատասխանատվություն ոչ միայն կատարողների, այլև նրանց հետ ակնհայտորեն հանցավոր համագործակցության մեջ գտնվող պաշտոնյաների համար»:

Տնօրենի պաշտոնը զբաղեցնելուց Գ. Պողոսյանի հրաժարվելուց հետո, ՀՀ բնապահպանության նախարար Արամ Հարությունյանի թիվ 335-Ա հրամանով 2012թ. դեկտեմբերի 10-ին «Խոսրովի անտառ» պետական արգելոց» ՊՈԱԿ-ի տնօրենի ժամանակավոր պաշտոնակատար նշանակվեց Հրաչյա Հովակիմյանը: Վերջինս 1992-1994թթ. հիշյալ արգելոցում աշխատել է որպես պահպանության գծով փոխտնօրեն:

Առաջիկայում պարզ կլինի, թե ովքեր կառաջադրեն իրենց թեկնածությունը հիշյալ ՊՈԱԿ-ի տնօրենի պաշտոնի համար: Այժմ կարող ենք ասել միայն, որ տվյալ մրցույթի վրա բևեռված է բնապահպանական քաղաքացիական նախաձեռնությունների և հասարակական կազմակերպությունների, բազմաթիվ ԶԼՄ-ների և առանձին անձանց ուշադրությունը, նոր տնօրենի ընտրության հարցում ապօրինությունն ու անարդարությունը չեն հանդուրժվելու:

Հեղինակ` Արթուր Հովհաննիսյան