Փաստ ինֆո

«Ես կարծում եմ, որ սա իսկապես շատ խորը վերլուծության և հետագա քննարկումների տեղիք է տալու, որովհետև այն, ինչ-որ կատարվեց հենց Էթիկայի հանձնաժողովի կողմից, ոտնահարում է Ազգային ժողովի կանոնակարգը: Ըստ էության, սա ասում է բոլոր պատգամավորներին, որ կարող եք չհարգել օրենքը: Էթիկայի հանձնաժողովը հակաէթիկական գործընթացի մեջ է»,- Ազգային ժողովի Էթիկայի հանձնաժողովի այսօրվա նիստից հետո լրագրողներին ասաց ՀՅԴ խմբակցության ղեկավար Արմեն Ռուստամյանը:

Հիշեցնենք, որ Էթիկայի հանձնաժողովը մերժեց Ա.Ռուստամյանի դիմումը, որով նա առաջարկել էր քննարկել 2012թ.-ի նոյեմբերի 21-ին հրավիրված խորհրդարանի արտահերթ նիստին չգրանցված 83 պատգամավորների կողմից ԱԺ կանոնակարգ-օրենքով սահմանված էթիկայի կանոնները խախտելու հարցը:

«Բացարձակ բավարարված չեմ, որովհետև մերժումը կատարվեց քվեարկություններով: Անհասկանալի էր նախ, որ քաղաքական ուժ կար, որ հայտն ընդունելուն կողմ էր, նույն տրամաբանությամբ Սահմանադրական դատարան դիմելուն կողմ էր, հիմա միացավ մեծամասնությանը, և դիմումը մերժվեց»,-հայտնեց նա` ակնարկելով հանձնաժողովում «Բարգավաճ Հայաստան» խմբակցության ներկայացուցչին:

Ըստ Ա.Ռուստամյանի, եթե խորհրդարանը ստեղծել է Էթիկայի հանձնաժողով, որպեսզի «արդարացվի ԱԺ պատգամավորի չմասնակցելը և տարբեր պատճառներ գտնեն ու մեկնաբանեն տարբեր պատգամավորների չմասնակցելը, իրավական տեսք տան դրան, ուրեմն այս հանձնաժողովը բացարձակապես իր նպատակներին չի ծառայում»:

Նա նշեց նաև, որ պատգամավորների կողմից էթիկայի կանոնները խախտված չլինելու վերաբերյալ տեսակետ հայտնողները, ըստ էության, նույնացնում են գրանցումը և քվեարկությունը, նիստի իրավազորության խնդիրն են դնում և հետո մոռանում, որ բոյկոտելու մասին խմբակցությունը հայտարարում է նիստում: Այդ ժամանակ քվեարկությանը չմասնակցելը համարվում է հարգելի,  սակայն, դա տեղի չի ունեցել: Դրան հակառակ, դիմել են ԱԺ նախագահին` հայտնելով իրենց բոյկոտի մասին և խնդրելով իրենց բացակայություննները համարել հարգելի, ինչը և ԱԺ նախագահն արել է, թեև բոյկոտի պարագայում   նման իրավասություն չուներ:

«Միայն խախտելով կարող էին ասել, որ ԱԺ պատգամավորները չեն խախտել կանոնակարգը, ինչը որ արեցին, և ԲՀԿ-ն միացավ իրենց»,-ընդգծեց Ա.Ռուստամյանը: Հանձնաժողովի ԲՀԿ ներկայացուցիչ Վահան Բաբայանն էլ քվեարկության ժամանակ հանրապետական երկու ներկայացուցիչներին միանալու կապակցությամբ նշեց, որ Էթիկայի հանձնաժողովը անկախ մարմին է և առաջնորդվում է «բացարձակապես իրավական, այլ ոչ` քաղաքական նորմերով»:

Ըստ նրա, հարցը քննարկվել է հանձնաժողովում, նաև` Ա.Ռուստամյանի առաջարկները, մեկնաբանությունները: «Ես, որպես Էթիկայի հանձնաժողովի անդամ, տեսնում եմ, որ այդտեղ էթիկայի կանոնների խախտում չկա: Այն պարագայում, երբ ԱԺ նախագահը նիստից բացակայողների բացակայությունը համարել է հարգելի, իսկ դա ԱԺ նախագահի բացառիկ իրավունքն է, ըստ ԱԺ կանոնակարգ-օրենքի, կարծում եմ, այդքանից հետո այդ հարցը քննարկելն անիմաստ է դառնում»,-ասաց նա:

Լուսանկարը` ըստ Ֆոտոլուրի

Հեղինակ` Գայանե Մելիքյան