Փաստ ինֆո

ՀՀ նախագահի թեկնածու, ԱԻՄ նախագահ  Պարույր Հայրիկյանն այսօր օգտվեց անհաղթահարելի խոչընդոտի պարագայում ընտրությունները երկու շաբաթով հետաձգելու իր իրավունքից և համապատասխան դիմում ներկայացրեց ՀՀ Սահմանադրական դատարան:

Լրագրողների  հետ զրույցում թեկնածուն նշեց, որ ցայժմ ձեռնպահ էր մնում այդ քայլին դիմելուց, սակայն իր նկատմամբ հունվարի 31-ի մահափորձից հետո անցած 10  օրերը ցույց տվեցին, որ իր դեմ հանդիման կանգնած է ընտրապայքարի համար  անհաղթահարելի խոչընդոտ: «Բնությունը ավելի ուժեղ է,   քան իմ ցանկությունը,  և ես այս 10 օրը կորցրեցի»,- ասաց Պ.Հայրիկյանը: Նա միաժամանակ  մտահոգություն հայտնեց, որ ընտրությունները հետաձգվելու դեպքում պետությունը լրացուցիչ ծախսեր պետք է անի՝  նոր քվեաթերթիկներ  տպագրի, անհարմարություններ կառաջանան նաև այն հազարից ավելի մարդկանց համար, ովքեր  Հայաստան են ժամանել որոշակի ժամանակացույցով, սակայն ժողովրդավարությունը դրանից ավելի կարևոր է:

Այդուհանդերձ,  Պ.Հայրիկյանը պատրաստ է ընտրապայքարին իր անհավասար մասնակցությունը  համարել ոչ էական և ետ վերցնել իր դիմումը, եթե կայանա համագործակցությունը ՀՀ նախագահի երեք ընդդիմադիր թեկնածուների՝  Րաֆֆի Հովհաննիսյանի, Հրանտ Բագրատյանի ու իր միջև, և ընդդիմությունը հանդես գա մեկ միասնական թեկնածուով:  «Երկրորդ փուլն անպայման կլինի,  բայց միավորվելու դեպքում մենք առաջին փուլում շատ բան փոխում ենք»,- ասաց Պ.Հայրիկյանը:  Այս առումով Պ.Հայրիկյանը առայժմ լավատեսություն ներշնչող շատ քիչ բան է տեսնում: Եթե այդ համագործակցությունը տեղի չունենա, ԱԻՄ առաջնորդը հույսեր  է կապում    քաղաքացիական համագործակցության հետ:

Պ.Հայրիկյանը ձեռնպահ մնաց իր նկատմամբ մահափորձի մասին խոսելուց, սակայն հույս հայտնեց, որ կբացահայտվեն պատվիրատուներն ու  նրանց պատվիրատուները, ովքեր բացի իրեն վերացնելուց, նպատակ ունեին երկրում նոր իրավիճակ ստեղծել. «Դա դավադրություն էր»,- ասաց թեկնածուն:

Ընդգծելով, որ ժողովրդավարությունն ու ահաբեկչությունը անհամատեղելի են, Պ.Հայրիկյանը հավելեց. «Մենք բոլորս պետք է ամեն ինչ անենք, որ մեր երկրում սերը թագավորի և որևէ մեկի ատելությունը ու չարությունը  չշեղի մեզ հիմնական ուղուց: Ինձ համար կարևորն այն է, որ որևէ ստահակ ի վիճակի չլինի մեր երկրի ժողովրդավարական գործընթացները շեղել բնականոն հունից»:

Հիշեցնենք, որ Պարույր Հայրիկյանն փետրվարի 9-ին առաջարկել է ՀՀ նախագահի թեկնածուներ Րաֆֆի Հովհաննիսյանին և Հրանտ Բագրատյանին հանդես գալ միասնաբար՝ նշելով. «Իրականում, եթե ես ընտրությունները հետաձգեմ 14 օրով, ապա մենք կարող ենք մեկ միասնական թեկնածուն առաջարկել, ի մի բերել բոլորիս ծրագրերը և 10 օր էլ միասին ներկայանալ ժողովրդին։ Եվ այդ դեպքում մեր միասնական տոկոսը ոչ թէ 70%, այլ՝ 80% էլ կդառնա»: