Փաստ ինֆո

«Մատաղիսի» գործով արդարացման դատավճռի դեմ բողոքները կքննվեն ՀՀ վերաքննիչ քրեական դատարանի դատավոր Եվա Դարբինյանի նախագահությամբ: Երկու բողոքներն էլ  ներկայացրել է մեղադրանքի կողմը:

Տուժող  Ռոման Եղիազարյանի իրավահաջորդ Գոհար Մելքոնյանը միջնորդում է վերանայել Շիրակի մարզի ընդհանուր իրավասության դատարանի՝ դատավոր Հ. Մովսեսյանի նախագահությամբ և դատավորներ Մ. Սարոյանի ու Ա. Խաչատրյանի մասնակցությամբ, անցյալ տարվա դեկտեմբերի 18-ի դատավճիռը և «կայացնել ճիշտ վճիռ»:

Դատավճռով  ամբաստանյալներ Ռազմիկ Սարգսյանը, Մուսա Սերոբյանն ու Արայիկ Զալյանը անմեղ էին  ճանաչվել   ու արդարացվել՝ կատարված հանցագործությանը նրանց մասնակցությունը ապացուցված չլինելու հիմքով: Ամբաստանյալները մեղադրվում էին  ՀՀ քրեական օրենսգրքի 112-րդ հոդվածի 2-րդ մասի 1-ին, 6-րդ և 14-րդ կետերով՝ դիտավորությամբ առողջությանը ծանր վնաս պատճառելը  երկու կամ ավելի անձանց նկատմամբ մի խումբ անձանց կամ կազմակերպված խմբի կողմից, ինչն անզգուշությամբ առաջացրել է  տուժողների՝ ամբաստանյալների ծառայակիցներ Ռոման Եղիազարյանի ու Հովսեփ Մկրտումյանի,   մահը:

Գործով դատավարական հսկողություն իրականացնող ՀՀ զինվորական դատախազությունը եւս միջնորդում է բեկանել արդարացման դատավճիռը և կայացնել մեղադրական դատավճիռ ՝ մեղավոր ճանաչելով  ամբաստանյալներին առաջադրված վերոհիշյալ մեղադրանքում և Ռազմիկ Սարգսյանին դատապարտել  7 տարվա, իսկ  Արայիկ Զալյանին ու  Մուսա Սերոբյանին`  8-ական  տարվա ազատազրկման:  Ըստ մեղադրող կողմի, դատարանի հետևությունները հիմնված չեն գործի հանգամանքների օբյեկտիվ և բազմակողմանի գնահատման վրա, հաշվի չեն առնվել մեղադրողների ներկայացրած փաստական բոլոր հանգամանքները, որոնց ըստ էության անդրադառնալու և իրավական գնահատման արժանացնելու դեպքում դատարանը կհանգեր գործի ելքը որոշող այլ հետևության:

Այս գործը երկար դատական ճանապարհ է անցել՝  Սյունիքի մարզի առաջին ատյանի դատարանի 2005թ. մայիսի 18-ի դատավճռով  Ռազմիկ Սարգսյանը, Մուսա Սերոբյանը եւ Արայիկ Զալյանը մեղավոր էին  ճանաչվել ՀՀ քրեական  օրենսգրքի 104-րդ հոդվածի  2-րդ մասի 1-ին, 5-րդ և 7-րդ կետերով՝  մի խումբ անձանց կամ  կազմակերպված խմբի կողմից երկու կամ ավելի անձանց առանձին դաժանությամբ սպանություն եւ  դատապարտվել էին  15-ական  տարվա ազատազրկման:

ՀՀ քրեական եւ զինվորական գործերով վերաքննիչ դատարանը, 2006թ. մայիսի 30-ի դատավճռով, առաջին ատյանի դատարանի դատավճիռը փոփոխել էր, և  Ռ. Սարգսյանին, Մ. Սերոբյանին ու Ա. Զալյանին դատապարտել  ցմահ ազատազրկման:

2006թ. դեկտեմբերի 22-ին ՀՀ վճռաբեկ դատարանի քրեական պալատի որոշմամբ, ստորադաս դատարանների դատավճիռները բեկանվել էին և նրանց մասով գործն ուղարկվել էր  նոր նախաքննության, իսկ ամբաստանյալների նկատմամբ ընտրված խափանման միջոց  կալանավորումը վերացվել էր:

2012թ. դեկտեմբերի 4-ին Շիրակի մարզի ընդհանուր իրավասության դատարանում, դատական վիճաբանությունների փուլում, մեղադրողները, ամբաստանյալներին  առաջադրված մեղադրանքը  փոփոխել էին եւ սպանության փոխարեն առաջադրել նոր մեղադրանք՝ ՀՀ քրեական օրենսգրքի  112-րդ  հոդվածի 2-րդ մասի 1-ին, 6-րդ եւ 14-րդ կետերով:

Ի վերջո Շիրակի մարզի ընդհանուր իրավասության դատարանը Ռազմիկ  Սարգսյանի,  Մուսա Սերոբյանի և  Արայիկ  Զալյանի վերաբերյալ կայացրել  էր արդարացման դատավճիռ: