Փաստ ինֆո

Վերաքննիչ քրեական դատարանում քննվում է ժամկետային զինծառայող Նարեկ Հ.-ի գործով բերված վերաքննիչ բողոքը:

Ըստ մեղադրական եզրակացության` Նարեկը ծառայել է որպես զինվորական դասակի վարորդ: Կարծելով, թե ոչ բնական ճանապարհով սեռական հարաբերություններ ունեցած անձինք ազատվում են զինծառայությունից և զորացրվում` 2012թ. ապրիլի 13-ին կարգապահական մեկուսարանում կարգապահական տույժ կրելու ընթացքում խաբեության միջոցով զինվորական պարտականությունները կրելուց վերջնականապես ազատվելու նպատակով, վաղաժամ պահեստազոր զորացրվելու ակնկալիքով Նարեկն իր հետ տույժ կրող զինվորներին ու մեկուսարանի աշխատակիցներին սուտ տեղեկություններ է հայտնել` իբր նախքան բանակ զորակոչվելն ընկերուհու հետ ոչ բնական ճանապարհով ունեցել է սեռական հարաբերություններ:

Սյունիքի մարզի ընդհանուր իրավասության առաջին ատյանի դատարանը եզրակացրել է, որ Նարեկին մեղսագրվող արարքի կատարման փաստը հաստատվել է դատաքննությամբ ստուգված և ձեռք բերված ապացույցներով:

Թերթը գրում է, որ դատարանում Նարեկը ժխտել է իր մեղքը և նշել, որ այնուամենայնիվ մեկ անգամ իր ասած ձևով սեռական հարաբերություն ունեցել է: Սակայն դա ուրիշների ներկայությամբ պատմելով` նպատակ չի ունեցել զինծառայությունից վերջնականապես ազատվելու: Գլուխ գովելու նման մի բան է արել: Նարեկը հրաժարվել է նախաքննական ցուցմունքներից և ասել, որ դատարանում տված ցուցմուքններն են ճիշտ:

Սակայն դատարանը եզրակացրել է, որ ամբաստանյալի դատաքննական ցուցմունքներն արժանահավատ չեն, և նա նպատակ է հետապնդում պատասխանատվությունից խույս տալու:

2012թ. դեկտեմբերի 3-ի դատավճռով Նարեկը մեղավոր է ճանաչվել և դատապարտվել ազատազրկման` 3 տարի ժամկետով:

Նարեկի շահերի պաշտպանը վերաքննիչ բողոք է ներկայացրել` խնդրելով իր պաշտպանյալին արդարացնել` նրա արարքում հանցակազմի բացակայության հիմքով: