Փաստ ինֆո

Վերաքննիչ քրեական դատարանում սկսվել է Լուսինե Ներսիսյանի գործով բերված վերաքննիչ բողոքի քննությունը:

Թերթը գրում է, որ ըստ մեղադրանքի` Լ. Ներսիսյանը, խարդախությամբ, պոռնկությամբ զբաղվելու նպատակով 2010թ. Երևանում հավաքագրել է թվով 3 կանանց, որոնցից մեկը` անչափահաս, և կազմակերպել նրանց տեղափոխումը Թուրքիայի Մարմարիս քաղաք: Նա Թուրքիայում մոդելավորողի, վարսահարդարի, բնակարանների մաքրությամբ զբաղվողի բարձր վարձատրվող աշխատանքով ապահովելու կեղծ խոստումներ է տվել հավաքագրված կանանց: Մնչդեռ տեղ հասնելուն պես` նրանցից վերցրել է անձնագրերը և վերջիններիս վիճակի խոցելիությունն օգտագործելով, նյութական օգուտ ստանալու նպատակով 2010թ. օգոստոսից մինչև հոկտեմբեր նրանց ենթարկել է սեռական շահագործման ` ստիպելով զբաղվել մարմնավաճառությամբ ` տիրանալով դրանից գոյացած գումարներին:

Գործը քննվել է Երևանի Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանում: Դատաքննության ընթացքում Լ. Ներսիսյանն իրեն մեղավոր չի ճանաչել և ցուցմունք է տվել, որ ինքը ոչ մեկին չի հավաքագրել և սեռական շահագործման համար Թուրքիա չի տեղափոխել:

Դատարանը Լ. Ներսիսյանին մեկ դրվագով անմեղ է ճանաչել` հանցակազմի բացակության հիմքով, իսկ մյուս երկու դրվագներով Լ. Ներսիսյանը մեղավոր է ճանաչվել և դատարանի` 2012թ. դեկտեմբերի 18-ի դատավճռով դատապարտվել ազատազրկման` 8 տարի ժամկետով:

Դատավճռի դեմ վերաքննիչ բողոքներ են բերել մեղադրողը, ամբաստանյալը և ամբաստանյալի շահերի պաշտպանը:

Ամբաստանյալը և նրա շահերի պաշտպանը պահանջում են արդարացման դատավճիռ կայացնել, քանի որ, ըստ նրանց, Լ. Ներսիսյանի կողմից հանցավոր արարքներ ընդհանրապես չեն կատարվել:

Իսկ մեղադրողը պահանջում է Լ. Ներսիսյանին մեղավոր ճանաչել նաև այն դրվագով, որով նա առաջին ատյանի դատարանի դատավճռով անմեղ էր ճանաչվել, և նրան դատապարտել 9 տարվա ազատազրկման:

Մեղադրողն իր բողոքը կհիմնավորի դատական հաջորդ նիստին: