Փաստ ինֆո

ՀՅԴ-ն ընտրություններից մի քանի օր առաջ կհայտարարի, թե իր ընտրազանգվածը ինչպես քվեարկի: «Շտապելու կարիք չկա, որովհետև, ինչպես տեսնում եք, փոփոխություններն անսպասելիորեն են տեղի ունենում, մինչև վերջին պահն էլ հայտնի չի, թե ընտրությունը փետրվարի 18-ին կկայանա, թե Պարույր Հայրիկյանը կորոշի երկու շաբաթով հետաձգել»,- փետրվարի 8-ի ճեպազրույցում հայտնեց Ազգային ժողովի ՀՅԴ խմբակցության ղեկավար Արմեն Ռուստամյանը:

Նա նշեց, որ, անձամբ ինքն արդեն ասել է, որ հակված է գնալ և քվեաթերթիկի վրա գրել «բոլորին դեմ»: «Դժբախտաբար, չանցավ մեր առաջարկը, որ քվեաթերթիկի մեջ լինի բոլորին դեմ քվեարկելու հնարավորություն, որը հնարավորություն կտար, որպեսզի իրավական հետևանքներ առաջացներ մեր բոյկոտը»,-ասաց Ա.Ռուստամյանը` հավելելով, որ այդ դեպքում իրենք նման կոչ կանեին, «որովհետև Ընտրական օրենսգիրքը նախկինում թույլ էր տալիս, որ 50 տոկոսից ավելի բոլորին դեմ քվեարկելու դեպքում ընտրությունները համարվեն չկայացած»:

ՀՅԴ խմբակցության ղեկավարի համոզմամբ, ընտրությունների կազմակերպման և անցկացման ընթացքի հետ կապված ընտրողների կարծիքը հայտնելու առումով սա «ճիշտ ձև էր»: «Դժբախտաբար, դա չանցավ, որովհետև իշխանություններին անհրաժեշտ է հեզասահ անցկացնել բոլոր ընտրությունները, և հիմա ստիպված այդ «բոլորին դեմ»-ը գրելու եմ քվեաթերթիկի վրա, որով, բնական է, անվավեր կդառնա այդ քվեաթերթիկը, ինչը և նպատակ ունի ընդգծել, շեշտել այս ընտրությունների անվավերությունը»,-նշեց Ա.Ռուստամյանը` ընդգծելով, որ ՀՅԴ-ի «չմասնակցելը պայքարի ձև է, որի իմաստն այն է, որ պետք է վերջ դնել այսպիսի ընտրությունների անցկացմանը»:

Ընդդիմադիր մյուս` «Հայ ազգային կոնգրես» խմբակցության քարտուղար Արամ Մանուկյանն էլ ընդգծեց, որ իրեն բացարձակապես չեն հետաքրքրում առաջիկա ընտրությունների ոչ ընթացքը և ոչ էլ` արդյունքը: «Հայաստանի քաղաքական դաշտը այս իշխանությունն այնքան ամայացրեց, որ հիմնական թեկնածուներն այսօր պայքարի մեջ չեն: Սա ոչ մրցունակ քաղաքական ակցիա է»,-նշեց նա:

Ա.Մանուկյանը միաժամանակ հայտնեց, որ ՀԱԿ-ին մի քանի ամսում հաջողվեց պատրաստել ընտրական հանձնաժողովների 1500 անդամներ, և նրանց միջոցով կվերահսկեն «ընդամենը գործընթացը», ուղիղ կապ պահպանելով նաև ԵԱՀԿ-ի դիտորդների հետ: «Վերահսկողություն, որքան որ հնարավոր է, կփորձենք իրականացնել, բնականաբար, լինելով անաչառ: Մեզ ուրիշ բան չի հետաքրքրում»,-ընդգծեց Ա.Մանուկյանը:

Լուսանկարն՝ ըստ Ֆոտոլուրի