Փաստ ինֆո

Գարիկ Կապզմալյանը բաց նամակով դիմել է ՀՀ Նախագահին` ներկայացնելով իր հետ կատարվածը: Նա իր նամակում մասնավորապես նշում է, որ ինքը 2011թ. ապրիլին որոշել է իր անձնական ավտոմեքենան տալ վարձակալությամբ: Այդ կապակցությամբ «Գինդ» շաբաթաթերթում հայտարարություն է զետեղել: Արդյունքում` հայտարարությամբ նրան այցելել են Հայկ Ահարոնյանը և զինվորական, մայորի կոչմամբ Արմեն Հովակիմյանը:

Ըստ նամակագրի` Գարիկ Կապզմալյանի, ինքը պայմանագիր է կնքել Հ. Ահարոնյանի հետ` մայոր Ա. Հովակիմյանի ակտիվ մասնակցությամբ` մեկ ամիս ժամկետով, 6500 դրամ օրավարձով: Եվ երբ Կապզմալյանը պահանջել է Հ. Ահարոնյանի անձնագիրը, վերջինս անձնագիր չունենալու պատճառով չի ներկայացրել այն:

Փոխարենը միջամտել է Ա. Հովակիմյանը` ասելով, որ իր անձնագիրը կթողնի Կապզմալյանի մոտ` պայմանով, որ պայմանագրում անձնագրի տվյալները չնշվեն:

Ինչպես ներկայացնում է նամակագիրը, հետագայում համոզվելով, որ ինքը խաբվել է, 2011թ. մայիսի 16-ին դիմել է ՀՀ ոստիկանության Նոր Նորքի բաժին և հետաքննիչ Ա. Շարոյանին հանձնել կողմերի միջև կնքված պայմանագիրը և մայոր Ա. Հովակիմյանի անձնագիրը:

Հարուցվել է քրեական գործ, կատարվել է նախաքննություն, որը վարել է քննիչ Ն. Հարությունյանը:

«Նախաքննությամբ պարզ դարձավ, որ նրանք երկուսով նախօրոք հանցավոր համաձայնության գալով, միտումնավոր եկել էին, որպեսզի խաբելով ինձ` տիրանան ավտոմեքենայիս»,- գրում է Գ. Կապզմալյանը:

Պարզվել է նաև, որ Հ. Ահարոնյանը խոշոր գումար է պարտք եղել Ա. Հովակիմյանին: Նոր Նորքի ոստիկանությունը 2011թ. հուլիսին ձերբակալել է Հ. Ահարոնյանին, իսկ մայոր Ա. Հովակիմյանի գործն ուղարկել ՀՀ ՊՆ քննչական բաժին: Սակայն վերջինս ազատվել է պատասխանատվությունից:

Նամակագիրը նշում է, որ բազմիցս բողոքել է զինդատախազություն և դիմել նաև ՀՀ գլխավոր դատախազություն: