Փաստ ինֆո

Կրկին ամբաստանյալի աթոռին է հայտնվել Արմավիրի մարզի Գետաշեն գյուղում հաշվառված, նախկինում դատված, «Կլոր» մականվամբ հայտնի Հովիկ Լևոնի Բաբայանը:

Այս անգամ էլ նա մեղադրվում է խոշոր չափերով խարդախության և սուտ մատնության մեջ։ Մասնավորապես, ըստ քննության նյութերի, Հ.Բաբայանը, խարդախությամբ խոշոր չափերի ուրիշի գույք հափշտակելու դիտավորությամբ, չարաշահելով տարբեր մարդկանց վստահությունը և ներկայանալով որպես ՀՀ Վերաքննիչ դատարանի աշխատակից կամ դատավորի օգնական, ՀՀ ԱՆ ԴԱՀԿ ծառայության կողմից աճուրդով վաճառվող ավտոմեքենաները գնելու պատրվակով վերցրել է խոշոր չափի գումարներ, սակայն վերցրած գումարներն օգտագործել է անձնական կարիքների համար և խարդախությամբ տիրացել գումարներին:

Բացի վերոնշյալից, ըստ մեղադրական եզրակացության, Հ. Բաբայանը կատարել է նաև սուտ մատնություն` հայտնելով, որ անհայտ անձինք իրեն ազատությունից ապօրինի զրկել են: Հ. Բաբայանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 2-րդ մասի 2-րդ կետի և 333-րդ հոդվածի («Սուտ մատնությունը») 1-ին մասի հատկանիշներով, նրա նկատմամբ որպես խափանման միջոց ընտրվել է կալանքը:

Հ.Բաբայանի գործով մեղադրական եզրակացությունը դատախազությունը հաստատել է և գործն ուղարկել դատարան։ Ներկայումս քննվում է սուտ մատնության դրվագը և դատարան են հրավիրվել ու հարցաքննվել հյուրանոցային համալիրի աշխատակիցները։ Վերջիններիս Հ.Բաբայանը ներկայացել է որպես դատավոր, ով «ցմահ մարդ է դատել ու փախած է» և խնդրել ոչ ոքի չհայտնել իր գտնվելու վայրի մասին: Երբ համալիրի աշխատողները նրանից պահանջել են վճարել վարձած սենյակի և ուտելիքի համար՝ 16 հազար դրամ, նախ նա, ըստ վկաների ցուցմունքների, հրաժարվել է վճարել, ապա հավաստել, որ կզանգի իր վարորդին և վերջինս գումարը կբերի: Սակայն իրականում ամբաստանյալը զանգահարել է ոստիկանություն և ըստ ոստիկանի կազմած զեկուցագրի, հայտարարել. «Բանգլադեշում եմ (խոսքը Երևանի թաղամասի մասին է), զալոժնիկի (պատանդի) կարգավիճակում եմ, եկեք, հասեք»:

Վկաները դատական նիստում միաբերան հերքել են ապօրինի ազատությունից զրկելու ամբաստանյալի հայտարարությունը։ Ըստ նրանց, դուռը բաց էր և իրենք նույնիսկ ներկա չեն եղել ոստիկանություն կատարված «ահազանգին»:

Հիշեցնենք, որ Հ. Բաբայանը նախկինում ևս մեղադրվել է խարդախության մեջ։ 2008 թվականին նրան մեղադրանք էր առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետի հատկանիշներով, այսինքն` առանձնապես խոշոր չափերով խարդախություն կատարելու համար։ Այն ժամանակ քննությամբ պարզվել էր, որ նա ներկայացել էր որպես դատախազ, մասնավորապես՝ Արմավիրի մարզի դատախազի և նրա տեղակալների անունից տարբեր քաղաքացիներից հազարավոր դոլարների հասնող գումարներ էր վերցրել` որոշակի խնդիրներ լուծելու խոստումներ տալով։