Փաստ ինֆո

Վանաձորի հանրային պաշտպանի գրասենյակի պաշտպան, փաստաբան Գուրգեն Հարությունյանն անցած տարվա ամռանը գրավոր միջնորդություն է ուղարկել Լոռու մարզի դատախազ Կ. Շահբազյանին և ոստիկանության Լոռու մարզի քննչական բաժնի պետ Թաթուլ Շուշանյանին` պահանջելով գրավոր ներողություն հայցել իրենց:

Ըստ թերթի` Լոռու մարզի ընդհանուր իրավասության առաջին ատյանի դատարանը խուլիգանության մեջ մեղադրվող վանաձորցի Մ. Կիրակոսյանի նկատմամբ կայացրել է արդարացման վճիռ: Վերջինի պաշտպանությունն իրականացրել է Վանաձորի հանրային պաշտպանի գրասենյակի պաշտպան, փաստաբան Գուրգեն Հարությունյանը:

Մեղադրող կողմը վերաքննիչ բողոք է բերել, որտեղ նշվել է, որ քրեական գործի շրջանակներում փաստաբանը տուժողին և վկային դրդել է սուտ ցուցմունք տալ:

Արդյունքում` ոստիկանության Լոռու մարզի քննչական բաժնում Գուրգեն Հարությունյանի նկատմամբ հարուցվել է քրեական գործ:

2012թ. մայիսի 18-ին Լոռու մարզի ընդհանուր իրավասության առաջին ատյանի դատարանը որոշում է կայացրել պարտավորեցնել ոստիկանության Լոռու մարզի քննչական բաժնին վերացնել փաստաբան Գուրգեն Հարությունյանի նկատմամբ հարուցված քրեական գործը և այն վարույթ ընդունելու մասին որոշումը:

Գ. Հարությունյանի փոխանցմամբ` 2012թ. մայիսի 30-ին Լոռու մարզի դատախազության դատախազ Ս. Խաչատրյանը որոշում է կայացրել ոստիկանության Լոռու մարզի քննչական բաժնի քննիչ Ռ. Երիցյանի` 2012թ. ապրիլի 25-ի որոշումը վերացնելու մասին, ինչպես նաև կարճել հարուցված քրեական գործի վարույթը:

«ՀՀ քրեական դատավարության օրենսգրքի 66-րդ հոդվածի 10-րդ կետի կատեգորիկ պահանջն է, որ քրեական հետապնդման մարմինը պարտավոր է գրավոր ներողություն հայցել արդարացվածից, իսկ նույն օրենսգրքի 6-րդ հոդվածի 22-րդ կետի համաձայն` քրեական հետապնդման մարմիններն են՝ դատախազը, քննիչը և հետաքննության մարմինը»,- թերթի թղթակցի հետ զրույցում ասել է փաստաբան Գ. Հարությունյանը` հավելելով, որ մինչ օրս պատկան մարմինները չեն արձագանքել իր միջնորդությանը և իրենից գրավոր ներողություն չեն հայցել: