Փաստ ինֆո

ՀՀ փաստաբանների պալատի անդամներից 26-ի նկատմամբ 2012թ. հարուցվել է 28 կարգապահական վարույթ, որից 15-ի մասով, սակայն, կարճվել է, իսկ հինգի առնչությամբ կարգապահական վարույթները դեռ չեն լսվել։ Վերջին 5 վարույթները հարուցվել են Երևանի Աջափնյակ և Շենգավիթ վարչական շրջանների, Կոտայքի և Արմավիրի մարզերի ընդհանուր իրավասության առաջին ատյանի դատարաններից ստացված սանկցիաների, ինչպես նաև քաղաքացու դիմումի հիման վրա:

Նշենք, որ 2013թ. հունվարի 1-ի դրությամբ գործող փաստաբանները 1354-ն են: Փաստաբանների պալատի նախագահ Ռուբեն Սահակյանը մեզ հետ զրույցում փաստաբանների դեմ 2012թ. ընթացքում ներկայացված բողոքների քանակը, համեմատելով փաստաբանների քանակի հետ, համարեց սովորական ցուցանիշ: Նրա տեղեկացմամբ, վարույթներից 11-ը հարուցվել է քաղաքացիների դիմում-բողոքների հիման վրա, մեկը` փաստաբան Քրիստինե Ստեփանյանի նկատմամբ, ինքն է հարուցել, 13-ը հարուցվել է դատարաններից ստացված սանկցիաների, մեկական վարույթներ հարուցվել են ՀՀ ոստիկանության ՔԳՎ հատկապես կարևոր գործերի քննության վարչությունից, ոստիկանությունից ստացված հաղորդագրությունների, մեկն էլ` փաստաբան Սեդրակյանից ստացված դիմումի հիման վրա:

Կարճվել են քաղաքացիների դիմումների հիման վրա փաստաբաններ Արթուր Գրիգորյանի նկատմամբ հարուցված վարույթներից երկուսը, Աշոտ Ոսկանյանի նկատմամբ հարուցված վարույթներից մեկը, ինչպես նաև Էմին Խաչատրյանի և Ռոման Կոնինյանի նկատմամբ հարուցված վարույթները: Բացի նշվածներից, կարճվել են նաև դատարաններից ստացված սանկցիաների հիման վրա փաստաբաններ Վահե Գրիգորյանի, Հրանտ Գևորգյանի, Թամարա Պողոսյանի, Ստեփան Ոսկանյանի, Կրոմվել Գրիգորյանի, Արտակ Ալոյանի, Էմին Խաչատրյանի, Հովհաննես Գալյանի, Էդգար Արամյանի և Գուրգեն Մադոյանի նկատմամբ հարուցված վարույթները, ինչպես նաև ՀՀ ոստիկանության ՔԳՎ հատկապես կարևոր գործերի քննության վարչությունից ստացված հաղորդագրության հիման վրա փաստաբան Տիգրան Եգորյանի նկատմամբ հարուցված վարույթը:

- Այն բողոքներում, դիմումներում, որոնցով Փաստաբանների պալատի նախագահը տեսնում է փաստաբանի վարքագծի կանոնագրքի որևէ հոդվածի կամ հոդվածների խախտում, հարուցում է կարգապահական վարույթ, վարույթը հանձնվում է գործը նախապատրաստող անձին, որպիսիք ընտրվում են պալատի ընդհանուր ժողովի կողմից, նրանք պատրաստում են նյութերը, երկամսյա ժամկետում փոխանցում են պալատի խորհրդին, որից հետո մակագրվում է խորհրդի անդամներից որևէ մեկին, որը հանդես է գալիս որպես զեկուցող,- ասաց Ռ. Սահակյանը:- Այնուհետև պալատի խորհրդում քննարկվում է հարցը ու կայացվում որոշում: Խորհրդի այդ քննարկմանը չի մասնակցում կարգապահական վարույթ հարուցող անձը, այսինքն` պալատի նախագահը:

Մի շարք կարգապահական վարույթների արդյունքում կիրառվել են տարբեր տույժեր: Փաստաբաններ Քրիստինե Ստեփանյանին, Արթուր Գրիգորյանին, Վահագն Բաբայանին, Գևորգ Շիրինյանին, Տիգրան Եգորյանին և Լուսինե Հակոբյանին հայտարարվել է նկատողություն, Աշոտ Ոսկանյանին` 4 նկատողություն, 3 փաստաբանի՝ Լիանա Գրիգորյանին, Էդիկ Մայսուրյանին, Թադևոս Ալեքսանյանին` խիստ նկատողություն, իսկ Ռոմեն Ահարոնյանի նկատմամբ տուգանք` 200 000 դրամի չափով, ինչպես նաև վերապատրաստում:

- Մենք ստանում ենք հարուցված վարույթների քանակից երևի քառակի, հնգակի ավելի դիմում-բողոքներ` զանազան բնույթի, բայց դրանցով չի հարուցվում կարգապահական վարույթ տարբեր պատճառներով, օրինակ, դիմումատուն իր դժգոհությունն է հայտնել փաստաբանից, բայց փաստաբանի անունն էլ չի գրել,- տեղեկացրեց ՀՀ փաստաբանների պալատի նախագահը:- Կամ` նշել է, որ փաստաբանն իր նկատմամբ թույլ է տվել այս-այս խախտումները, բայց մենք տեսնում ենք, որ այդտեղ խախտում չկա, քաղաքացին ընդամենը դժգոհ է նրանից, որ այդ փաստաբանը հանդես է գալիս իր շահերին հակառակ, այսինքն` մյուս կողմի ներկայացուցիչն է ու նրա շահերն է պաշտպանում: Երբեմն գրում են, որ հակառակ կողմի ներկայացուցիչ հանդիսացող փաստաբանը կեղծ փաստաթուղթ է ներկայացրել դատարան: Մենք բացատրում ենք, որ կեղծ փաստաթղթի հարցը Փաստաբանների պալատի լուծելիք խնդիրը չէ, գործը գտնվում է դատարանում, համապատասխան միջնորդություն ներկայացրեք դատարանին, ձեր կարծիքը հայտնեք, որ փաստաթուղթը կեղծ է, դատարանն իր մոտեցումը կցուցաբերի, կնշանակի փորձաքննություն և այլ գործողություններով կպարզի, կբավարարի ձեր միջնորդությունը կամ կմերժի, մենք հո քննիչ կամ փորձագետ չե՞նք… Այսպիսի անտեղի բողոքներ շատ-շատ են լինում:

Ինչպես տեղեկացանք Ռ. Սահակյանից, փաստաբանների նկատմամբ սանկցիաները սկսվում են նկատողությունից, իսկ ամենախիստ տույժը արտոնագրի գործողության դադարեցումն է:

Լուսանկարն՝ ըստ Ֆոտոլուրի

Հեղինակ` Արթուր Հովհաննիսյան