Փաստ ինֆո

Թերթը գրում է, որ երեկ Տավուշի մարզի ընդհանուր իրավասության առաջին ատյանի դատարանում շարունակվել է Տավուշի մարզի «Մեհրաբ» զորամասում զոհված լեյտենանտ Արտակ Նազարյանի գործով նիստը:

Թերթի թղթակիցը զրուցել է տուժողի իրավահաջորդ Ծովինար Նազարյանի հետ, ով նշել է, որ նախորդ նիստում տուժող կողմը միջնորդություն էր ներկայացրել հինգ հոգու հեռախոսահամարների լրացուցիչ վերծանությունը ստանալու պահանջով, ինչը դատարանը մերժել է:

«Տեղի ունեցավ թերևս ամենակարևոր միջնորդություններից մեկը. իմ ներկայացուցիչ Ռ. Մարտիրոսյանը միջնորդեց, որպեսզի դատարան հրավիրվեն դատաձգաբանական երկու փորձագետներն, ովքեր եզրակացություն էին տվել այն մասին, թե հենակետի անձնակազմի անդամներից ում վրա կան կրակոցի արգասիքներ»,- ասել է Ծ. Նազարյանը:

Դատարանը մերժել է միջնորդությունը:

Իսկ Ա. Նազարյանի իրավահաջորդի մյուս ներկայացուցիչ Մուշեղ Շուշանյանը նշել է. «Դատական նիստում տեղի ունեցած ամենաաղաղակող ապօրինությունն այն էր, որ տուժողի իրավահաջորդ Ռ. Մարտիրոսյանին, իր միջնորդության մերժումից հետո, թույլ չտրվեց հայտարարություն անել: Իսկ երբ Ռ. Մարտիրոսյանը համառեց, որ ինքն ուզում է հայտարարություն անել, դատավորն ուղղակի որոշեց նրա նկատմամբ դատական սանկցիա կիրառել և նրան հեռացրեց դահլիճից»:

Տուժողի ներկայացուցիչները թերթի թղթակցի հետ զրույցում նշել են, որ գործողություններ են իրականացնելու, որպեսզի դատավոր Սամվել Մարդանյանը ենթարկվի քրեական պատասխանատվության: