Փաստ ինֆո

Ձևավորված ավանդույթը հուշում է, որ Հայաստանում հնարավոր չէ ընտրությունների միջոցով ձևավորել ժողովրդի իշխանություն:  Այս մասին ՀՀ Ազգային ժողովի պատգամավորների հայտարարությունների ժամին այսօր հայտարարեց  ԱԺ «Ժառանգություն» խմբակցության ղեկավար Ռուբեն Հակոբյանը:

 

«Մեր ընտրողը դրանում համոզվել է իր տառապանքի փորձով. հանրապետական գրեթե բոլոր ընտրություննեի ընթացքում անհավասար պայքարի մեջ են մտել` մի կողմից իշխող քաղաքական ուժի, մյուս կողմից` ազգի, մեր պետության և պետականության շահերը: Ցավոք, այս դեպքում նույնպես ավանդույթի ուժով պետության, ազգի շահերի նկատմամբ ջախջախիչ հաղթանակ է տարել օրվա իշխող խմբավորման շահը»: Արդյունքում, ըստ պատգամավորի, «այսօր ունենք մինչև 50 տոկոս ստվերային տնտեսություն, մենաշնորհների հաղթարշավ, կոռումպացված պետական կառավարման համակարգ, բոլոր ոլորտներում «ատկատների» շքերթ, իսկ որպես այս ամենի հետևանք`իր չափերով ազգային անվտանգությանը սպառնացող արտագաղթ, որն այլևս սոցիալական դիտարկելը ճիշտ չէ:

 

Թեև իշխանության ներկայացուցիչները հրապարակային ելույթներում կամ առանձին զրույցներում գրեթե երդվում են, որ անցկացնելու են ազատ, արդար, քաղաքակիթ ընտրություններ, սակայն, ըստ պատգամավորի,  իրականությունն այն է, որ «տեղական ինքնակառավարման մարմինները տեղերում անթաքույց սկսել են ընտրողների անձնագրերի կամ անձնագրային տվյալների հավաքագրում՝ ամենատարբեր խոստումներով, հորդորներով ու հարկադրանքներով: Դպրոցներում վարչական ռեսուրսների օգտագործումը հասել է նրան, որ ծնողական ժողովները վերածվել են իշխող ուժի թեկնածուին սատարելու քարոզչության ու ծնողների նկատմամբ հարկանդրանքի, շանտաժի: Եթե իսկապես ազնիվ է բարձրագույն իշխանության երդումը արդար ընտրություներ անցկացնելու մասին, ապա առնվազն այն պետք է փոխանցվի տեղերում` ի գործադրումն, եթե ոչ` Նժդեհը ունի մարդու այդ տեսակի նկատմամբ իր պատկերավոր գնահատականը»,- ընդգծեց նա:

 

Փաստելով, որ այս ընտրապայքարը շահեկանորեն տարբերվում է նախորդներից իր հռետորիկայով, ագրեսիվ լարվածության բացակայությամբ, ԱԺ պատգամավորը միաժամանակ ընդգծեց՝ «մյուս կողմից առանձնանում է քաղաքական ավանտյուրայի որոշ էլեմենտներով և երեսպաշտության առավել պրոֆեսիոնալ դրսևորումներով: Եկեք իսկապես հարգենք մեր հրապարակային խոստումներն ու երդումները և գոնե այս անգամ մարդավարի անցկացնենք արժանապատիվ, արդար ընտրություններ»,- ասաց նա:

 

ՀՀ նախագահի թեկնածու, «Ժառանգություն» կուսակցության առաջնորդ  Րաֆֆի Հովհաննիսյանի նախընտրական շտաբի անունից Ռ.Հակոբյանը դիմեց  ընտրողներին՝ խնդրանքով և հորդորով, որպեսզի փետրվարի 18-ին յուրաքանչյուր ընտրող իր արժանապատվությունը, իր ես-ը, իր երեխայի ապագայի նկատմամբ պատասխանատվությունը տանի ընտրատեղամաս, և խղճի մտոք իր քվեով ձևավորի արժանի իշխանություն:  Հավատացե´ք, հարգելի´ հայրենակիցներ, որ միայն ընտրություններին Ձեր ակտիվ մասնակցությամբ և միասնական ուժերով այդ քվեի պաշտպանմամբ է պայմանավորված Ձեր և Ձեր երեխաների, մեր բոլորի և, իհարկե, մեր պետության ապագան»,- հավելեց Ռ.Հակոբյանը: