Փաստ ինֆո

Ահաբեկչությունը քաղաքական կյանքն իր բնական ուղուց չպետք է շեղի, - լրագրողների հետ հանդիպման ժամանակ այսօր հայտարարել է ՀՀ նախագահի թեկնածու Պարույր Հայրիկյանն այդպիսով, ըստ էության, հիմնավորելով ընտրությունները հետաձգելու պահանջ չներկայացնելու իր որոշումը։

Ի դեպ, լրագրողների հետ հանդիպումը նախատեսված էր Պ.Հայրիկյանի նախընտրական շտաբի ներկայացուցիչների հետ, որին մասնակցելու համար թեկնածուն դուրս էր եկել հիվանդանոցից։ «Առաջին օրը չէ որ ինձ փորձում են սպանել, բայց երբեք իմ դեմ չի եղել՝ փորձել են սպանել այն արժեքները, որոնք ես փորձել եմ դարձնել ժողովրդի սեփականությունը՝ ժողովրդավարություն, անկախություն, ինքնորոշում, մարդու իրավունքներ»,- ասաց Պ.Հայրիկյանը՝ միաժամանակ հիմարություն որակեց իշխանությունների հետ գործարքի մեջ մտնելու մասին խոսակցությունները։ Ի դեպ, նման կարծիք է հայտնել թեկնածուներից մեկը՝ պնդելով, որ եթե Հայրիկյանը չդիմի ՍԴ, ապա նա իշխանությունների հետ գործարքի մեջ է մտել։

Նախընտրական շտաբը համակարծիք չէ նաև այն կարծիքի հետ, թե Պ.Հայրիկյանի նկատմամբ կատարված սպանության փորձը նպաստել է վերջինիս վարկանիշի բարձրացմանը։ «Երբ նախագահի թեկնածուն հայտնվում է հիվանդանոցում դա ստեղծում է բացասական իմիջ նրա համար, այսինքն՝ այդ մարդը խոցելի է, և բացի դա Հայրիկյանի դրդապատճառները երբևիցե չեն եղել շահարկել կոնկրետ մոտեցում: Ստեղծված աշխատանքային խմբի ուսումնասիրությունները ևս ցույց են տվել, որ չկա շոշափելի շարժ»,- լրագրողների հետ հանդիպման ժամանակ այսօր հայտարարել է ՀՀ նախագահի թեկնածու Պ.Հայրիկյանի նախընտրական շտաբի միջազգային կապերի պատասխանատու Կարո Եղնուկյանը։